Drag Queens cola saya colorada

A lo llargo del mundu munches foron les dives de la música elevaes a la categoria de mitos pola comunidá gai. Los sos cantares y la so estética foron un salvavides qu’abellugó a les persones que nun entraron dientro de los cánones de la sociedá heteropatriarcal. Mesmamente, la muerte de l’actriz y cantante Judy Garland el 22 de xunu de 1969 foi ún de los detonantes que fixo españar seis díes depués los disturbios de Stonewall, guañu del movimientu de lliberación LGTB actual y primer vez na historia que’l colectivu se llevantó contra un mundu qu’escorría a les persones non normatives.

Nel Estáu español, les folclóriques foron les dives gai llariegues. Los homosexuales que vivieron la represión de la dictadura franquista toparon nes lletres de León y Quiroga, Quintero o Rafael de León esi sentimientu común. La copla, con lletres que falaben de muyeres empoderaes y d’amores prohibíos, supunxo una vía d’escape y lliberación. Mesmamente, Lola Flores, Isabel Pantoja o Rocio Jurado convirtiéronse nos antecedentes de RuPaul. La so estética esaxerada y les bates de cola foron la fonte d’inspiración de los primeros tresformistes españoles.

«Ye muncho lo que podríen ufrir al tresformismu patriu figures como les de ‘La Pastorina’ o Diamantina Rodríguez»

Nuna Asturies que cada día desconoz más la so propia identidá, les drag queens tamién miraron pa les folclóriques andaluces y pa les grandes dives de la música norteamericana. Una pena, porque de xuru que ye muncho lo que podríen ufrir al tresformismu patriu figures como les de María Rosa Quero ‘La Pastorina’, la reina de la canción melódica asturiana, o Diamantina Rodríguez, coles sos tonaes protagonizaes por muyeres empoderaes. Nin falar yá del xuegu que podría dar el traxe d’asturiana de la Sección Femenina cola so saya colorada..

Hasta l’apaición de Rodrigo Cuevas, la música asturiana nun tuvo iconos LGTB. Llevamos décades de retrasu neso. Con too, dalguna blima hai. Un exemplu ye’l mayor hit de la historia de la música n’asturianu: el «Nun yes tu» de Los Berrones. Esti cantar fala d’una muyer transexual que tuvo que marchar del so pueblu pa poder ser llibre. Anque representa una voz popular y un comportamientu que refugaba una identidá non normativa, el «Nun yes tu» introduz temes novedosos pal so tiempu, como desllexitimar l’arcadia feliz de l’Asturies rural de la que muncha xente tuvo que marchar pa poder vivir la so sexualidá.

Rodrigo Cuevas, iconu LGTB de la música asturiana

El «Nun yes tu» llegó a sonar nes radios y televisiones de Madrid a finales de los años ochenta. Sicasí, hubo qu’esperar hasta l’añu 2000 pa topar otru referente LGTB na música asturiana. Foi col cantar «La molinera» de Corquiéu, que recueye la primer historia d’amor lésbicu de la nuestra escena folk. Foron pingarates que valieron pa dar voz a una realidá silenciada y qu’a los asturianos nos contaron dende fuera y n’otra llingua.

Too cambió na segunda década del sieglu XX, cuando dellos músicos cambiaron la manera d’encarase col repertoriu tradicional. La superación de los roles de xéneru y la estética empezaron a xugar un papel importante nel folk asturianu. Nomes como’l mentáu Rodrigo Cuevas o Ún de Grao, por poner namás dos exemplos, frañaron colos estereotipos y falaron en primer persona de rellaciones ente persones del mesmu sexu. El colectivu LGTB asturianu empezó a tener referentes nos que mirase. Xente que s’atrevió a tresgredir devolviendo a la nuestra tradicción musical la so funcionalidá d’entretenimientu comunal, que ye una de les coses que fai tan atractiva la so propuesta.

Los Berrones interpretando “Nun Yes Tu” na Semanona de Xixón (2004)

Y agora, la nuestra escena sonora reblaga tolo andao con Engarradiella, un discu onde una montonera de grupos de la escena punk y rock dan voz a una realidá qu’hasta’l momentu nun se tratara en profundidá na nuestra música, como la LGTBfobia o la teoría queer. Pel momentu Asturies nun tien grandes dives que suenen nes pistes de baille de les discos de moda y que les drag queens imiten. Igual nin fai falta, porque yá tien una voz propia que nun pasa per Chueca y la hexemonia cultural capitalista.

Una voz propia que tamién supón una vuelta al orixe, cuando los primeros discursos políticos que defendieron la llibertá sexual vinieron dende movimientos d’esquierdes radicales. Una voz propia que nun escaez la homofobia, la tresfobia, el machismu y que refuga la heteronormalización de les rellaciones ente les persones del propiu colectivu. Un pasu de xigante dende aquella muyer transexual que caleyaba per Xixón cola cara entafarrá y enseñando’l corvieyón. La prehistoria d’esti Engarradiella.

DAMIÁN BARREIRO. Artículu publicáu orixinalmente nel Anuariu de la Música Asturiana 2020

Comprar Engarradiella na tienda online o sentilu nes plataformes dixitales


Dexa un comentariu

X