Probablemente seyan estes les palabres más difíciles que tenga escrito, les qu’enxamás pensé que tendría que facer. La mio mente tovía nun quier creyer que Damián yá nun tea ente nós; delles veces hasta me xuega un mala pasada y faime velu pela cai, como si d’un alcuentru inesperáu se tratare. La rellación siguida, intensa y fonda que caltuvimos dende hai munchos años ye’l motivu pol que nun me resigno a tar ensin él.
Coincidimos cuando Damián malapenes tenía ventipocos años, Asturies ye un país pequeñu y nos círculos asturianistes conocémonos toos, dende’l primer momentu conectemos y entamemos una rellación que trescendió la simple amistá hasta convertise en dalgo más. Incoporóse al conseyu de redacción del Anuariu de la Música Asturiana, aportando la so visión sobre la escena sonora del país, sobre los sos aciertos y debilidaes. Nesta faceta suya de periodista musical foi onde escomenzó, pasu ente pasu, a reivindicar unos artistes y un estilu denostáu pol asturianismu musical hasta entós, él mesmu bautizólu como pop llariegu, englobando nél a nomes como El Presi, La Pastorina, Almas Unidas o Vicente Díaz, teorizó sobre la so relevancia social y estudió les sos característiques como fenómenu popular. Ente les munches coses que-y quedaben por facer a Damián ta’l llibru sobre esta corriente musical, que sé que tenía empezáu y que, por desgracia, yá nunca vamos ver espublizáu. Muncho falamos d’ello nes charres urxentes que teníemos tando yo de conceyal n’Avilés, tomando’l cafetín a media mañana n’El Cafetón. La so visión desprexuiciada foi fundamental pa recuperar dende una óptica asturianista a unos artistes que nun tiempu dificil apostaron por facer una canción llixera inequívocamente asturiana y de calter popular. Muncho-y debemos a Damián nesti sen, abriéndonos los güeyos y, especialmente, los oyíos a unes formes musicales despreciaes inxustamente pol movimientu asturianista.
«La so visión desprexuiciada foi fundamental pa recuperar dende una óptica asturianista a unos artistes que nun tiempu dificil apostaron por facer una canción llixera inequívocamente asturiana y de calter popular»
Con esta visión siempre abierta y cercana a la cultura popular preparó un proyectu que presentemos a la dirección de la RTPA, llogrando’l preste pa la so emisión. Tratábase d’un programa televisivu llamáu Nel Cantu la Memoria, nel que cada capítulu tenía como protagonista un cantar que fuere mui popular ente la sociedá asturiana, tanto de calter tradicional como d’autor conocíu. Damián vivía cada episodiu y yera una gociada velu disfrutar faciéndolu; ellaboraba les sos contestualizaciones, les entrevistes, preparaba les imáxenes d’archivu, buscaba distintes versiones… too ello con pasión y profesionalidá. Peles dos temporaes que duró’l programa foron pasando cantares como «Soi de Verdiciu», «Nun yes tú», «Lamento de gaitas», «Nel Pozu María Luisa» o «Chalaneru». Pero hubo ún mui especial, el que-y dedicó al tema «Qué tien esta sidrina», que grabemos nuna de les sidreríes icóniques d’Avilés, Casa Lin, onde ta’l cuadru qu’inspiró a Vicente Díaz pa componer el cantar, coles permunches espresiones alredor de la sidra. Presenciar aquel alcuentru ente Damián Barreiro y Vicente Díaz, ver cómo lu entrevistaba, ye ún de los meyores recuerdos colos que voi quedar.
«Damián vivía cada episodiu y yera una gociada velu disfrutar faciéndolu; ellaboraba les sos contestualizaciones, les entrevistes, preparaba les imáxenes d’archivu, buscaba distintes versiones… too ello con pasión y profesionalidá»
L’últimu proyectu nel que tuvo trabayando y que presentemos tamién a RTPA, pero esta vez ensin éxitu, foi ún mui del estilu de Damián. Titulábase Pequeñina y galana y nél proponía un averamientu a la imaxe de la virxe de Cuadonga como sinónimu d’asturianía, falando de como de ser un símbolu relixosu tresformárase nun símbolu identitariu y nun iconu cultural, faciendo parte anguaño de la cultura pop asturiana. Como tolos trabayos de Damián, esti proyectu taba perbién documentáu y desarrolláu, teniendo pensao hasta los detalles más pequeños.
«Damián ye l’exemplu perfectu d’ensayista contemporaneu asturianu, con una escritura áxil, coherente y de llectura asequible, lloñe del barroquismu y la seudointelectualidá mui daos n’otros y otres autores»
Prensa, televisión y radio nun yeren ayenos al llabor escomanáu de Damián, con una mente siempre activa, pensando’l próximu proyectu. Y compaxinándolo con too ello escribir, dalgo que sabía facer con maestría, con claridá, con pedagoxía, como bon periodista que yera, sabiendo facese entender. Damián ye l’exemplu perfectu d’ensayista contemporaneu asturianu, con una escritura áxil, coherente y de llectura asequible, lloñe del barroquismu y la seudointelectualidá mui daos n’otros y otres autores. Foi un gran estudiosu del papel qu’han xugar los medios de comunicación na conservación de les llingües minorizaes, teorizando fondamente y con xeitu sobre la situación asturiana, proponiendo soluciones y llinies a siguir. Gracies a él contamos con unos trabayos fundamentales a la de facer una bona política llingüística nos medios públicos de comunicación asturianos, cuando los sos responsables tengan a bien llevala a cau. Personalmente, tengo qu’agradece-y que m’afalare a llanzame a escribir l’ensayu sobre la historia de la música asturiana que titulé Hai una llinia trazada, siendo él el primer llector, dándome conseyos colos qu’ameyorar el testu. Ver el mio nome al llau del suyu nel Premiu ‘Máximo Fuertes Acevedo’ ye pa min un grandísimu honor.
«Gracies a él contamos con unos trabayos fundamentales a la de facer una bona política llingüística nos medios públicos de comunicación asturianos, cuando los sos responsables tengan a bien llevala a cau»
Cola so última obra enseñónos qu’hai una cultura popular asturiana que modula la nuestra identidá cásique ensin decatanos, eso qu’él llamó Asturianía Kistch, con elementos que podemos alcontrar en cualquier tienda de souvenirs del país: pegatines cola frase «Con fabes y sidrina nun fai falta gasolina», imanes d’horros, figures de Pinón y Telva, moñeques cola saya colorada… toos ellos iconos pop d’una identidá asturiana a la que Damián-y dio consistencia y visibiliidá.
«Nesti actu ta representáu’l Damián amigu, el Damián escritor, el Damián periodista, el Damián militante y, tamién, el Damián compañeru. Facetes d’una personalidá irrepetible que tuvi la suerte de compartir»
Nesti actu ta representáu’l Damián amigu, el Damián escritor, el Damián periodista, el Damián militante y, tamién, el Damián compañeru. Facetes d’una personalidá irrepetible que tuvi la suerte de compartir. Quedo con esos momentos vivíos: cuando aconceyábemos pa preparar el siguiente númberu del Anuariu, cuando ellaborábemos otru proyectu, cuando compartíemos micrófonu, cuando díbemos a dalgún conciertu, cuando percorríemos la cai garraos a la pancarta de la Xunta Pola… Too ello yá nun me lo quita naide y ye a lo que voi garrame cuando la so ausencia se me faiga demasiao doliosa. ¡Quiérote, Damián!
Testu lleíu nel actu Universu Damián, entamáu pola Xunta pola Defensa de la Llingua Asturiana Semeya: Tania González (Nortes).
Suscríbite a les nuestres novedaes
