Yá se conocen dalgunes de les novedaes discográfiques que va haber esti 2025. Estos díes D’Urria, Ochobre y Bacotexo foron publicando peles sos redes sociales conteníu rellacionáu col so pasu pel estudiu de grabación. Falamos con ellos p’afondar nos qu’estes formaciones folk, rock y punk van llanzar nos próximos meses.
El primer grupu ye l’astur-l.lacianiegu D’Urria, onde anguaño toquen ocho músicos. Tán grabando pasín ente pasu nos Estudios 15:40 con Luis Senén Fernández, en Perdones. «Decidimos facer un parón nos conciertos agora pa poder entrar nel estudiu y dir grabando temas con un poucu de tranquilidá», comenta Jose Manuel Sabugo ‘Sabu L’Aviseu’, el cabezaleru del grupu. Con esta premisa, tán faciendo un llabor sele que va poder sentise pronto en formatu dixital, con delles collaboraciones, como yá ficieren nel so primer trabayu discográficu, En Ca Pla. Una amuesa d’ello pue esfrutase yá nel videu de ‘Redondo‘ qu’asoleyaron nes sos redes sociales la selmana pasada, grabáu por Cristina Velasco en Matalavitsa, cola sonoridá folk y personal que-yos caracteriza y na que siguen afondando con esti proyectu viniente.
La banda punk Ochobre vuelven con un LP de nueve temes que van llanzar en formatu dixital y físicu en xunu: La rabia nos dientes. Pablo Viña ye’l productor d’esti discu nel que va poder sentise nún de los temes la collaboración d’una de les voces de muyer del rock astur, Pitxe -Skontra, Brutus’ Daughters, The Cilvrnigans, Bronca-. «Les lletres del discu siguen siendo la bandera d’Ochobre: munchu pesu social, munchu compromisu y muncha conciencia de clase. Seis de les nueve tán compuestes por Adrián Calvillo, l’anterior cantante del grupu», desplica Natalia González.
La rabia nos dientes va espeyar la so evolución dende’l so caberu trabayu Sobredosis de Grisú, mesmo no musical que no visual, como comenta la gaitera: «Préstanos pensar que l’esfuerzu puestu na evolución musical del grupu nesti discu pue percibise tamién a güelpe de vista. Anque hai tres temes que filen más directamente col discu anterior, más apegaos al punk rock cenciellu y directu; alcontramos otros seis qu’entamen a beber d’otros estilos: enfotándose más nel punk melódicu pero con llixeres influencies del hardcore, el celtic punk o incluso’l metal». La renovación de la identidá gráfica d’Ochobre ta fecha por Iago Datriga.
Mar (2018) foi’l cuartu trabayu de la banda de rock en gallego-asturianu Bacotexo, formada en Tapia en 2007. Anguaño tán grabando un discu con nueve temes que quieren asoleyar esti branu y nel que van poder sentise composiciones nueves pente les qu’abandonen el calter conceptual que teníen les sos caberes referencies. «Son cancióis más directas, pero sempre col noso cuño de rock nel que se cuidan muito as lletras y as armonías vocales. Hailas directas y crudas, pero tamén más delicadas y con un desarrollo un pouquín más complexo. É nas lletras unde s’encontra el eixe temático del LP. Todas as cancióis tán relacionadas cua idea dos paraísos perdidos y os paraísos novos que se van topando na vida». Comenten, amás, que van contar con delles collaboraciones como Ross Gala y Sam Rodríguez, anque entá-yos queden otres por concretar.
Suscríbite a les nuestres novedaes
