Güei entama en Piloña la 54 edición del Festival de l’Ablana, eventu qu’hasta’l 20 d’ochobre va axuntar una montonera d’actividaes culturales, gastronómiques y deportives, ente les que la música n’asturianu tien una presencia importante. Nesta ocasión la música’l país van ponela la Banda Gaites LaKadarma, Anabel Santiago, Soi Panderetera, La Xaranga, l’A.F Picos d’Europa y Los Muiles. Amás va celebrase’l IX Alcuentru de Bandes de Gaites, el VI Concursu de CAnción Asturiana y el conciertu XXXIII Aniversariu de la Coral Polifónica Piloñesa.
La programación de música n’asturianu entama esti vienres 3 a les 19h cola actuación de la Banda Gaites LaKadarma enantes de la gala inaugural del festival. Darréu d’ello, Anabel Santiago va ufrir un conciertu a les 21h na Casa la Cultura. Pal sábadu 4 los sones de raigañu caltienen el protagonismu coles actuaciones de Soi Panderetera (13.30h) y La Xarangana (18h). El mercáu tradicional del festival que se desendolca en L’Infiestu tamién va tar animáu’l domingu 5 a les doce’l mediudía pola Asociación Folclórica Picos d’Europa.
El mesmu domingu a les 18h ye’l IX Alcuentru de Bandes de Gaites nel que Picos d’Europa-DOP, LaKadarma y la berciana Vega de Espinareda van desfilar dende la Plaza María Xosefa Canellada hasta la Plaza’l Ganáu. Yá pa la selmana qu’entra, el xueves 9 a les 19.30h na Casa la Cultura, ye’l VI Concursu de Canción Asturiana n’homenaxe a Josefina Argüeles «La Calandria de Vegadotos».
El sábadu 11 a les 11.30h na Ilesia Parroquial ye’l conciertu XXXIII Aniversariu Coral Polifónica Piloñesa. Nél van actuar la Coral Polifónica Santiago López de Pravia, el Coru Mixtu Peñasanta-Ramón Prada de Cangues d’Onís y la coral anfitriona. La programación musical zárrase’l llunes 13 colos pasucáis de la bandina Los Muiles.
Suscríbite a les nuestres novedaes
