Torna l’Alcuentru de Folclor de L’Infiestu, eventu entamáu por La Benéfica qu’axunta agrupaciones, artistes persones rellacionaes cola música y balle de raigañu mesmo d’Asturies qu’otres d’otros comunidaes culturales. Nesta edición la cita pasa a durar dos díes, con dos formatos estremaos: el vienres 11 de setiembre toca en La Benéfica‘l grupu cántabru Casapalma y el sábadu 12 ye l’alcuentru pa tocar pelos chigres y cais de L’Infiestu con Prau Llerón (Asturies), Eingo Taldea (País Vascu) y Pan Sen Fron (Galicia).
«L’Alcuentru nació con una idea bien cenciella: vivir la música tradicional d’una manera popular, na cai y ente la xente. Préstanos descubrir cómo se canta, se toca y se bailla n’otros llugares, compartir maneres distintes d’entender el folclor y crear un espaciu onde toes elles puedan alcontrase. Nestos últimos años escuchamos, cantamos y baillamos muñeires, verdiales, xotes de tolos tipos, siguiríes, rondeñes, fandangos y pandeiraes… La nuestra propuesta, baxar el folclor de los escenarios y disfrutalu na cai, con rondes pelos chigres y les places del pueblu, paez que funcionó, asina qu’esti añu volvemos con dalguna qu’otra novedá«, despliquen dende La Benéfica p’anunciar la cuarta edición d’estos alcuentros.
La principal novedá ye que l’eventu suma una xornada protagonizada por un conciertu de música de raigañu. La banda convidada ye Casapalma, dúu cántabru bien conocíu n’Asturies -en Piloña, tocaran hai unos años nel Vermutazu qu’entama La Benéfica na AMC Pepe Bocanegra- qu’amesta música tradicional y electrónica. La banda fórmenla Irene Atienza y Yoel Molina, que sumen más de 15 años d’esperiencia nel sector musical, y el so discu nuevu, JOTAS, ye un llaboratoriu col qu’esploren les llendes de los ritmos y les formes del baille tradicional «a lo suelto», respetando los códigos colos que la panderetera guía a los bailladores. Les entraes yá tán a la venta por diez euros.
Amás del folclor de Cantabria, nesta edición tamién ta representáu’l de los otros países de la cornisa cantábrica: Galicia, Asturies y País Vascu. Asina ye como’l sábadu 12, l’Alcuentru de Folclor percuerre los chigres y les places de L’Infiestu dende les doce del mediudía cola participación de trés formaciones d’estos territorios: Pan Sen Fron, Prau Llerón y Eingo Taldea.
Les gallegues Pan Sen Fron (Pandeireteiras Sen Fronteiros), faen música tradicional con voces, percusión y «una enerxía bien mala de contener», como despliquen dende La Benéfica, que les califiquen de «divertidísimes, imprevisibles y especialmente afayaíces pa la nuestra intención d’alteriar moderadamente l’orde públicu a base de panderetes». Xunto a elles va tar el Grupu Folclóricu Prau Llerón de Mieres, una de les formaciones más destacaes del baille’l país, y l’agrupación euskaldun Eingo Taldea.
Amás, como tolos años, l’Alcuentru de Folclor de L’Infiestu ta abiertu a la participación de tol mundu que quiera sumase: «Si formes parte d’una agrupación, toques un instrumentu, cantes o bailles —sea de manera profesional, amateur o simplemente porque te presta—, esperamos por ti. Y si nun toques nengún instrumentu, tampoco tienes escusa. Nel Alcuentru nun fai falta distinguir una xota d’una muñeira en tres segundos, nin saber tolos pasos, nin tener una pandereta en casa. Puedes venir acompañar la ronda, echar unos bailles, cantar cuando t’apeteza o simplemente dexate sorprender mientres tomes una botella de sidra», añaden dende La Benéfica , que nos próximos díes van anunciar los horarios, el percorríu completu, los chigres participantes y el restu de detalles de la programación.
Suscríbite a les nuestres novedaes
