Más de 60 artistes llevanten la zarzuela Carretera de Avilés, un percorríu musical y emocional pela Asturies de mediaos del sieglu XX que va poder esfrutase nel Auditoriu del Centru Niemeyer d’Avilés esti sábadu 21 d’avientu a les 20.30h. Les entraes yá tán escosaes. Nel espectáculu participen el tenor Emilio Menéndez, la soprano Paula Lueje, l’intérprete de tonada Rubén Tamargo, el monologuista Manuel Reguero «El maestru», un elenco de músicos y músiques, y delles formaciones venceyaes a la danza y tradiciones avilesines.
La tonada ‘Carretera d’Avilés’, una de les asturianaes más reconocíes del repertoriu, ye’l pegoyu d’esta zarzuela con testos de Santiago García Castañón y dirección de Béznar Arias, qu’amiesta la canción asturiana, la lírica, el baille y más elementos, col cantar popular avilesín nel horizonte, siempre presente. Nel argumentu, canciones y costumes crúcense nel Avilés rural, onde los sos habitantes van ver cómo la villa de Pedro Menéndez pasa a convertise nun llugar de confluyencia como resultáu de la industrialización.
Suscríbite a les nuestres novedaes
