Esti sábadu 21 d’avientu a les 17.30h el LABshop de Xixón -mercáu d’arte y diseñu qu’acueye LLABoral Centru d’Arte y Creación Industrial- va ser el primer escenariu onde se va representar l’espectáculu ‘Ser quien a cantar’. La escritora Sofía Castañón, la música Sara Friera, la fotógrafa y realizadora audiovisual Daniela Cohen y la percusionista Jimena Menéndez ponen el so arte nuna actuación «poética, musical y visual que reflexona sobre la ocupación del espaciu públicu per parte de les muyeres, siendo tamién un homenaxe a la xenealoxía que foi abriendo camín pa toes», como desplica Castañón.
«La idea surde a partir de unos poemes qu’escribí sobre qué supón romper col espaciu de lo íntimo, lo privao, y sonar (la percusión, la voz) no público», cunta Sofía Castañón, que reconoz lo importante que ye pa ella facer esti proyectu con otres muyeres «a les qu’almira», en rellación a les sos compañeres nesti proyectu. Nel espectáculu «van poder sentise poemes, cantares y dalgo mui importante: les voces de muyeres como Nené Losada, Mari Luz Cristobal Caunedo o Yolanda Huergo. Referentes que ficieron y faen país«.
‘Ser quien a cantar’ ta interpretáu dafechu en llingua asturiana y, como comenta la escritora, la so idea «ye poder movelo dientro y fuera d’Asturies«. Mentanto, la primer ocasión de velu ye la d’esti sábadu a les 17.30h nel plató de LLABoral Centru d’Arte y Creación Industrial, con entrada llibre.
Suscríbite a les nuestres novedaes
