El circuitu Asturies Cultura en Rede abre la convocatoria de propuestes pal primer semestre de 2023

Yá ta abierta una convocatoria nueva d’Asturies Cultura en Rede, el circuitu qu’entama la Sociedá Pública de Xestión y Promoción Turística y Cultural del Principáu d’Asturies pa promover a lo llargo de los conceyos del país eventos musicales, de cultura tradicional, d’artes escéniques y de lliteratura. Hasta’l 28 de payares ta abierta esta nueva convocatoria pa la selección de proyectos y ellaboración de catálogos que valgan como base pa la programación en sales o espacios culturales dende’l 23 de xineru al 30 de xunu del 2023.

Pa poder participar nel circuitu de Música y Artes Escéniques ye necesario que los proyectos tean inscritos a traviés del Catálogu de l’Actividá escénica y musical asturiana enantes del 28 de payares a les 23:59. Nel casu de los espectáculos que yá tean incorporaos, nun ye necesario volver a tramitar la so incorporación; queden formando parte del catálogu pal periodu señaláu. La Conseyería va garrar esti catálogu como base pa la programación del Circuitu de Música del programa Asturies, Cultura en Rede.

Los proyectos de divulgación de la historia, l’arqueoloxía, el patrimoniu, la cultura popular y la tradición asturiana -estaya baxo la que s’alcuentren espectáculos de música tradicional– tamién pueden presentase a la convocatoria al traviés de la URL http://panel.asturiesculturaenrede.es