L’Atalaya de Cimavilla ye de xemes en cuando l’escenariu de les llamaes Batalles de gallos, duelos llíricos onde dos MC’s -persones que rapeen- enfrente les sos rimes de manera improvisada. Estos eventos tienen una perbona asistencia de públicu ente la mocedá y, por estes y otres razones, el Conseyu de la Mocedá de Xixón (CMX), la Oficina de Normalización de Llingüística de Xixón y @hhopcast -proyectu dinamizador del hiphop n’Asturies-, inspírense nelles pa crear la primer Batalla de canciones n’asturianu.
Col «oxetivu de dar respuesta a los intereses de la mocedá asturfalante» naz esti certame que va celebrase’l 14 de xunu dende les 17.30h nel Auditoriu Dr. Cienfuegos Xovellanos de L’Atayala de Cimavilla. Nél pueden inscribise hasta un máximu de 20 solistes d’ente 14 y 35 años, cola condición de que los MC’s han tener un mínimu de tres temes propios. Precisamente, la particularidá del concursu ye que ye una batalla de canciones, non d’improvisación o freestyle -como sí lo son les batalles de gallos-.
Toles bases completes puen lleese equí y nelles recuéyese que’l primer premiu ye 300 € y la distribución dixital de los cantares con Musicasturiana.com; el segundu premiu son 200 € y un productu de la marca Puru Remangu; y el tercer premiu de 100 €.
«Les batalles de canciones son un espaciu de música nel qu’intercambiar conocimientu, xenerar diálogu y texer redes ente la mocedá dende’l respetu mutuu y la igualdá. Na organización tenemos l’oxetivu de proporcionar un espaciu de socialización y diversión onde la xente pueda tar cómodo y seguro», despliquen les promotores d’un eventu que nun va permitir «cualesquier acción misóxina» nin «actitúes tránsfobes nin lgtbifóbiques» nin «insultos, chancies, chistes y burlles de mal gustu». Too esto ta recoyío nel «llamamientu colectivu al cuidáu» qu’asoleya la propia organización de la Batalla de canciones n’asturianu.
Con esta actividá, Xixón sigui apostando por entamar distintes iniciatives en sofitu de la música’l país poniendo’l focu esta vegada en normalizar l’asturianu ente les xeneraciones más nueves y dar respuesta a los sos intereses.
Suscríbite a les nuestres novedaes
