El próximu domingu 9 de marzu dende les 10.30h, el Conceyu de la Gaita entama una bayura d’actividades d’accesu llibre pol Día Internacional de la Gaita nel Aula Didáctica del Muséu de la Gaita en Xixón -nel Muséu del Pueblu d’Asturies-. Nel eventu va haber una conferencia, dos presentaciones y un homenaxe. La celebración, que tamién va cuntar cola presencia de la Conseyera de Cultura, Política Llingüística y Deporte, Vanessa Gutiérrez, va finar con una espicha. Puede atopase más información na páxina web de l’asociación.
Susana de la Cruz Rodríguez va abrir la xuntanza a les 10.30h cola conferencia La presencia de la gaita en Cuba, una esbilla de la so investigación doctoral na que va facer un percorríu pela representación de la gaita asturiana y gallega nes músiques populares cubanes. Darréu, a les 11.30h Balbino Menéndez Suárez y Ricardo Soberado Hoyos van facer una presentación divulgativa del so llibru El floréu de gaita asturiana, asoleyáu a entamos d’esti añu pol RIDEA. Nesti cita van aprovehar pa compartir dellos resultaos de la so investigación, como despliquen nesti videu espardíu pol Conceyu de la Gaita.
A les 12.45h, Pelayo Fernández Fernández y Alfonso Fernández Álvarez van presentar la Gaita en Fa pa neñes y neños, montada gracies a les donaciones de Rosol Tex (Oliver Gaitas) y Montse Trabanco. Pa conmemorar el 110 aniversariu de Manuel de Cogollu, l’asociación va sortear esti instrumentu ente les persones asistentes a la espicha. Les actividaes nel Muséu de la Gaita van finar a les 13h, dempués de la intervención de la Conseyera de Cultura, col homenaxe a la gaitera de Sotrondio Keti García Fernández, un «reconocimientu a más de cincuenta años desendolcando l’oficiu tradicional de gaitera como solista, en pareya de gaita y tambor, acompañando asturianada y grupos de baille, asina como’l so llabor al frente de conxuntos como la Bandina de Gaites Valle del Nalón y, dende esti añu, de l’Asociación de la Canción y del Folclore Valle del Nalón». El Conceyu la Gaita cumple simbólicamente con una delda histórica del ámbitu del instrumentu n’Asturies pa coles muyeres referentes nel oficiu.
L’asistencia a la espicha, que va ser a les 14.30h nel Llagar El Trole de Xixón, precisa d’enllenar un formulariu, con plazu hasta esti vienres 7, amás d’abonar el preciu. El menú y demás instrucciones pueden atopase mesmo na páxina web del Conceyu la Gaita como nes sos redes sociales.
Suscríbite a les nuestres novedaes
