Muyeres pon el ramu a la xira del so espectáculu Humanes nel Teatru de La Llaboral de Xixón el próximu domingu 9 de marzu a les 19h. Les últimes entraes disponibles tán a la venta nesti enllaz y va ser la última oportunidá de ver l’actuación en directo.
Humanes foi’l so últimu discu -asoleyáu en 2020- y un trabayu históricu na so trayectoria porque, per primer vez, nun compilen cantares tradicionales, sinón qu’axunten 13 canciones de composición propia. Les lletres homenaxeen a les humanes; eses muyeres anónimes que ficieron historia. La música ye ellaborada, con muncha calidá y esplora distintos soníos dientro del folk asturianu. L’espectáculu, estrenáu nel Teatru La Llaboral de Xixón en xineru de 2020, aporta a esti conciertu fin de xira nel mesmu teatru. Nestos cuatro años pudo vese en dellos escenarios asturianos como’l MCC de Mieres, el Nuevu Teatru de La Felguera, el Niemeyer o nel festival Arcu Atlánticu de Xixón.
Muyeres ye ún de los nomes más importantes del folclor asturianu. Esti colectivu nació en 1993 cola unión de muyeres procedentes de dalgunos de los grupos d’investigación etnográfica más destacaos. L’oxetivu que teníen yera’l de reivindicar la música de percusión del país y el protagonismu de la muyer nel caltenimientu de la tradición sonora asturiana. Cuasi 30 años dempués, con seis discos publicaos y con una montonera d’espectáculos entamaos; siguen siendo una pieza fundamental de la cultura asturiana.
Suscríbite a les nuestres novedaes
