Ediciones Trabe asoleyó la segunda edición, revisada y aumentada, del métodu de gaita asturiana de Flavio R. Benito Alborada. Trátase d’una propuesta secuenciada de repertoriu pa los cuatros cursos del Grau Elemental de les enseñances del instrumentu nos conservatorios de música. Esta reedición inclúi una estaya nueva con 25 trescripciones, un repertoriu complementariu que recueye versiones pa gaita de cantares tradicionales, más pieces pa la danza y el baille, rareces y otres melodíes popularizaes nesta década dende la primer publicación. Amás, l’autor fizo un trabayu de revisión de les partitures, corrixendo y amestando información.
Nel llibru, Flavio R. Benito comparte delles notes sobre esta nueva edición, amás d’un breve apunte sobre la ornamentación indicada nes partitures. Les melodíes qu’apaecen nél son una esbilla del Cancionero musical de la lírica popular d’Eduardo Martínez Torner, antecedentes de los primeros cancioneros na época d’ente sieglos de Juan Martínez Abades y Víctor Sáenz, y dellos arquivos personales: alboraes, pasucáis, adautaciones del repertoriu relixosu y pal baille (xotes, xiraldilles, muñeires, saltones, sones d’arriba…). Tamién axunta composiciones del propiu autor.
Suscríbite a les nuestres novedaes
