El pasáu xunu nacía’l Conceyu de la Gaita, una asociación pa dinamizar el mundu d’esti instrumentu d’un xeitu tresversal. Coincidiendo col Día Internacional de la Gaita (International Bagpipe Day), el colectivu organiza pal domingu 10 de marzu nel Aula Didáctica del Muséu del Pueblu d’Asturies de Xixón una xornada d’actividaes coles que quier sumase a otres asociaciones y entidades tantu d’Europa como de tol mundu na celebración d’esta fecha.
La programación va arrancar a les diez de la mañana col saludu de bienllegada de Flavio R. Benito, presidente del Conceyu de la Gaita, que va dar pasu a les 10.30h a la conferencia Estudio acústico de la influencia de la geometría interior de las copas en la armonía del roncón, impartida por Giovanna Calvín García, Doctora Inxeniera Industrial y gaitera.
Tres d’una posa, José Luis Fernández El Gaiteru de Les Maces va ser homenaxeáu a les doce’l mediudía, mientres qu’a les 13h Xaime Arias & Carlos Casado van dar un conciertu de presentación del llibru 10 canciones asturianes pa gaita y pianu. Como broche pa la xornada, va haber una espicha de socios y simpatizantes (baxo reserva previa) a les 15h nel Llagar El Trole. Con esti eventu, el Conceyu de la Gaita da arranque a la programación d’actividaes que plantega facer a lo llargo d’esti 2024.
Suscríbite a les nuestres novedaes
