El próximu mes de xunu va facer 20 años desque la música asturiana perdió a dos de les sos figures más destacaes: Ígor Medio y Carlos Redondo. Cola so perda surdió la iniciativa N’Alcordanza, festival que celebró delles ediciones pa homenaxear a estos dos artistes, amás de reivindicar la música en vivo y les condiciones llaborales del sector. El 25 de xunetu vuelve esti conciertu con seis grupos y más de seis hores de música pa facer la previa Arcu Atlánticu de Xixón, que ta acabante de facer el primer avance de la so programación.
Esti conciertu especial axunta folk y rock alternativu, acordies a los estilos nos que desenvolvieron el so llabor Medio y Redondo. Pela parte tradicional van tocar van tocar les mítiques formaciones de folk asturianu Felpeyu y Llan de Cubel y los gallegos Hermanos Castro, fundadores de Felpeyu xunto a Ígor Medio y Ruma Barbero. A la estaya de rock independiente represéntenla Radio Fox -grupu tributu a Los Locos, nel que tocó Carlos Redondo-; Kactus Jack -banda enmarcada dientro del Xixón Sound-; y los gaditanos Jaguares de la Bahía, formación na que milita Paco Loco, destacáu productor y ex compañeru de Redondo en Los Locos.
Esti conciertu N’alcordanza va celebrase’l 25 de xunetu na Plaza Mayor de Xixón dende les 16h a les 22.30h y va calecer l’ambiente pal Arcu Atlánticu, festival que celebra la so XI edición dende’l llunes 27 de xunetu al domingu 2 d’agostu. Música, teatru, danza, artes plástiques y audiovisuales, gastronomía y cine rellacionao coles identidaes culturales de los pueblos integraos nesti territoriu van dar forma a la programación diseñada pola Fundación Municipal de Cultura, Educación y Universidá Popular de Xixón.
Ente la programación avanzada güei pola organización destaquen los conciertos de los irlandeses Leonard Barry Tríu y los bretones Talec Noguet. Leonard Barry ye un de los gaiteros más anovadores d’Irlanda, famosu poles sos actuaciones potentes en directo y la so conexón fonda cola tradición irlandesa, siendo reconocíu como un maestru de la gaita. Nesta ocasión va venir acompañáu pol so grupu, formáu por Martin Barry (voz, bouzouki,
guitarra) y Andy Morrow (violín) y actúen el 28 de xunetu a les 20.30h nel Centru de Cultura Antiguu Institutu.
D’otra banda, el cuartetu bretón Talec Noguet va ufrir un espectáculu qu’entemez música sele y música pa baillar. Rozenn Talec cola so voz, acompañada por Yanning Noguet al curdión diatónicu, Olivier Guenego a los teclaos y Timothée LeBour al saxofón, apurren matices del jazz d’anguaño y de la música improvisao al repertoriu tradicional bretón. Toquen tamién nel Centru de Cultura Antiguu Institutu, el 30 de xunetu a les 20.30h.
Amás d’ellos, la FMCEyUP anunció tamién actuaciones de les compañíes de danza Fran Sieira, cía de danza (Galicia), Harrobi Dantza Bertikala (País Vascu) y l’espectáculu musical portugués A Residência, creáu pol grupu post-rock First Breath After Coma y el reconocíu músicu Salvador Sobral. Toles actuaciones van desenvolvese mesmo al aire llibre -na Plaza Mayor, Plaza del Marqués, Campu Valdés, Torre del Reló, Plaza Arturo Arias, Plaza de Xovellanos, Xardinos de la Reina- que n’espacios zarraos -Centru de Cultura Antiguu Institutu, Antigua Escuela de Comercio, Muséu del Pueblu d’Asturies y Colexata de San Xuan Bautista-. Nos díes vinientes l’Ayuntamientu de Xixón va dir dando más novedaes d’esti festival qu’entamó de siguío ente 2012 y 2019 y que volvió a recuperar hai dos años.
Suscríbite a les nuestres novedaes
