Los conservatorios de música son instituciones educatives poco conocíes pa la mayor parte de la población, que munches veces caltienen la visión decimonónica d’ellos: dalgo asina como centros d’altu rendimientu nos que medra la virtuosidá d’instrumentistes que namás se dediquen a eso que llamamos «música clásica». Nel territoriu del Estáu español, los centros van desapegándose pasín ente pasu d’esa idea, anque la realidá de munchos de los centros públicos persigue, entá, esi retratu nel que les músiques contemporánees y el desendolcu d’una carrera diferente al solista virtuosu nun caben.
Uviéu acueye’l Conservatoriu Superior de Música ‘Eduardo Martínez Torner’ (CONSMUPA), un centru que comparte edificiu col Conservatoriu Profesional de Música ‘Anselmo González del Valle’ -ún de los cuatro qu’hai nel territoriu asturianu-. La Conseyería d’Educación qu’encabeza Lydia Espina ye l’órganu titular del centru, anque ta confinanciáu con fondos de la Unión Europea. Resuelta la so situación alministrativa, ¿en qué llexislación s’encuadra’l so enseñu? Anque les titulaciones superiores son equivalentes a les universitaries, les Enseñances Artístiques Superiores nun tán incluyíes nes universidades del Estáu. L’alderique sobre si los Conservatorios Superiores debieren introducise nel sistema universitariu vien de lloñe, con dellos sectores de la comunidá universitaria a la escontra d’ello -ente ellos, les facultades de Bellas Artes-. Nos caberos años paecía qu’esta situación podía desbloquease. Sicasí, la Llei 1/2024 pola que se regulen estes enseñances -y que va implantase nos cursos vinientes- nun contempla la so integración na Universidá.
«Anque les titulaciones superiores de música son equivalentes, les Enseñances Artístiques Superiores nun tán incluyíes nel sistema universitariu. La Llei 1/2024 pola que se regulen y que va implantase nos cursos vinientes tampoco contempla la so integración»
Nesi sen, l’Enseñu Superior de Música n’Asturies vese afectáu por cuestiones como la incompatibilidá pa exercer la carrera artística al marxe de la docencia, l’abandonu total de la cuestión investigadora, planes d’estudios desactualizaos, una oferta educativa y d’especialidaes más que llendada, un calendariu poco axustáu a les necesidaes del alumnáu, unes instalaciones insuficientes y munches otres torgues de sobra conocíes por toles estudiantes y profesores que pasaron pel centru. ¿Ye posible, asina, qu’espoxigue la creatividá? ¿Tien la creatividá un llugar propiu nel Conservatoriu Superior?
«L’Enseñu Superior de Música n’Asturies vese afectáu por munches torgues de sobra conocíes por toles estudiantes y profesores. ¿Ye posible, asina, qu’espoxigue la creatividá?»
Al rodiu d’esi diagnósticu cenciellu surden delles cuestiones pa les que contamos cola esperiencia y reflexones de cuatro persones que tán o tuvieron venceyaes al Conservatoriu Superior ‘Eduardo Martínez Torner’ y a otros Conservatorios Profesionales de Música d’Asturies: Marco Antonio García de Paz -director, violinista y docente n’escedencia-, Sonsoles Rodríguez Granda -pianista y docente n’activo nel Conservatoriu de Xixón-, Diego Fernández Martínez -gaiteru, alumnu del CONSMUPA y docente d’enseñu non regláu- y Virginia Fernández Álvarez -chelista, ex-alumna del CONSMUPA y mayestra-.
Les torgues del personal docente pa desendolcar la so actividá como intérpretes más alló de los centros ye una realidá. L’alministración asturiana caltién les incompatibilidaes que nun-yos permiten trabayar -porque eso ye lo que faen los músicos cuando xuben a un escenariu- fuera del centru. Teniendo en cuenta la so condición como funcionariáu -quien tien plaza, claro-, podría paecer una midida d’igualdá énte los demás cuerpos de l’Alministración, pero, ¿nun afecta a les sos práctiques dientro del aula? Virginia Fernández plantega la cuestión: «¿Cómo van enseñanos a interpretar si nun se-yos permite facelo? Col pasu del tiempu, van alloñándose de los escenarios, nun pueden ufrir conocimientu actualizáu, queden obsoletos, y, a la fin, ye la educación del alumnáu la que lo sufre». Diego, pel so llau, destaca lo difícil que ye atopar «anovación» docente por culpa d’esi sistema.
«¿Cómo van enseñanos a interpretar los docentes si nun se-yos permite facelo? Col pasu del tiempu, van alloñándose de los escenarios, nun pueden ufrir conocimientu actualizáu y, a la fin, ye la educación del alumnáu la que lo sufre»
«Ye una pena porque n’otres Comunidaes esto nun pasa, cuenten con unes midíes muncho más flexibles que permiten al profesoráu desendolcar esa actividá paralela. Nun ye lóxico porque arriquecería dafechu’l so llabor docente. De fechu, equí perdiéronse dalgunos grandes profesores y especialistes por esta llei que paez que naide tien intención de modificar», confiesa Sonsoles. Ella mesma destaca tamién que «los alumnos pueden tar en manes de docentes que lleven años ensin esponese énte’l públicu o, incluso, ensin practicar col instrumentu, y eso a l’Alministración nun-y paez mal». Marco ye, precisamente, ún d’esos profesores que decidieron aparcar la docencia nel sistema públicu d’enseñanza: «Tuvi que pidir una escedencia voluntaria pa poder facer música y siguir medrando como artista. Una cuestión incomprensible porque nos sitios onde la docencia tien más puxu, nun ye que namás se permite l’actividá musical del profesoráu, sinón que s’esixe y ye una condición pa caltener el puestu».
Pero, ¿qué consecuencies tien esti modelu educativu na creatividá? Pa Sonsoles son «enormes y nada positives», y añade: «La creatividá ha alimentase, nun ye namás una fortaleza personal que se tien o nun se tien. Si nun riegues una planta, muerre, y cola creatividá pasa lo mesmo. Si’l docente nun sema la so propia creatividá -en parte, al traviés de l’actividá artística-, dirá quedando nel escaezu y nun será una ferramienta habitual nel aula». Nel casu de Marco, anque lleva unos cinco años apartáu de los conservatorios, pon el focu tamién nello: «Nun toi en condiciones de xeneralizar, pero creo que tán poniéndose trabes abondes na posibilidá de facer medrar y desarrollar una creatividá xenuina basándose nun sistema d’enseñu munches veces academicista y a toes lluces caducu». Virginia, dende la so perspectiva como receptora d’esa docencia apunta, amás, a una sensación de tar nuna «burbuya que nun ye la realidá» y una «única llinia d’interpretación» que considera «equivocada».
«La creatividá ha alimentase, nun ye namás una fortaleza personal que se tien o nun se tien. Si’l docente nun sema la so propia creatividá dirá quedando nel escaezu y nun será una ferramienta habitual nel aula»
Toes estes reflexones interesantes sobre les consecuencies de torgar l’actividá a la parte docente de la ecuación del enseñu nos conservatorios han sumase a la falta de medios materiales suficientes que sufren munchos conservatorios pero qu’equí n’Asturies -y en otros sitios como Palma de Mallorca- ye tovía más evidente porque’l Conservatoriu Superior nun tien edificiu propiu. Poro, l’horariu de clases fina a les 15h p’acoyer les de les Enseñances Profesionales. L’alumnáu de Superior nun puede facer usu de los espacios nin malpenes de les cabines d’estudiu peles tardes -porque’l de Profesional tien prioridá dafechu-. Les cuasique quince cabines -los únicos espacios que pueden ocupase mientres la mañana fuera de la supervisión d’un profesor- tienen una falta grande de materiales en condiciones bones, dende menos banquetes que pianos a la inesistencia d’insonorización (sí, nun conservatoriu)-. El resultáu ye una gran dificultá pa estudiar dientro del centru pa la mayor parte d’instrumentos, y la imposibilidá total pa otros, como les gaites. Diego quéxase sobre ello: «ye una vergoña qu’un instrumentu que s’imparte nel centru nun se puea estudiar como los demás».
«El CONSMUPA sufre una falta de medios materiales evidente y nun tien edificiu propiu. El resultáu ye la dificultá pa estudiar dientro del centru, una variable determinante pa facilitar el deprendimientu y l’apaición d’espacios creativos»
Virginia Woolf, anque por cuenta de la cuestión emancipatoria de les muyeres y nun contestu burgués, yá falaba va cuasi un sieglu de la rellación directa ente la creación y medios materiales como la financiación y los espacios, un cuartu propiu. Marco, Sonsoles, Virginia y Diego coinciden en qu’esta variable ye determinante pa facilitar el deprendimientu y l’apaición d’espacios creativos. Marco, por exemplu, afonda nello dende delles perspectives: «Tolo que seya facilitar espacios de creación y esperimentación paezme fundamental, entá más cuando se pasen tantes hores nel centru. Ye esencial tener llugares de reunión, d’estudiu, d’ensayu y de reflexón. Esto inflúi muncho na calidá del deprendimientu y provoca un camín solitariu del alumnu. Failu, tamién, dependiente por demás de los sos profesores, dando llugar a un sistema de copia, un productu estandarizáu y que poques veces resulta únicu y con personalidá propia».
«Echo en falta tener recibío formación que me diese ferramientes pa crear música», asina resume Virginia la realidá de los planes d’estudiu y les programaciones d’anguaño, pelo menos nel CONSMUPA. Amás, pon un exemplu gráficu y refloxona al rodiu d’ello: «en cuatro años namás tuvimos una asignatura d’improvisación. Afortunadamente, tuvimos a una gran profesional impartiéndola, pero tenía que durar más pa tener tiempu a improvisar en munchos estilos. Hasta qu’entamó a escribise la música, los intérpretes improvisaben sobre unos acordes. Sicasí, nós nel conservatoriu entamamos y acabamos esposaos a una partitura. Nun siento que recibiera la formación suficiente como pa poder ser independiente d’ella y crear».
Esa «gran profesional» de la que fala Virginia ye Sonsoles, anque agora nel Conservatoriu de Xixón dedícase a acompañar clases de danza. La pianista afonda na «falta de conexón cola realidá contemporánea» y desplica que, anque determinaos departamentos del CONSMUPA como’l de Composición o dalgunos instrumentales sí espresen les sos inquietudes nesti sen, la norma ye la desconexón d’otros «mundos que tán ehí y pueden convertise nuna oportunidá llaboral, porque ye perdifícil vivir d’interpretar a Mozart y Beethoven». Ella, por exemplu, anque coles complicaciones que pon la Conseyería y que se comentaben enantes, forma parte de The Soulers, un grupu semi-profesional onde compón y interpreta temes pa los que fueron pernecesaries eses ferramientes que nun aporten al alumnáu y qu’ella sí tuvo la suerte d’alimentar de la mano d’una de les sos profesores nel so tiempu como estudiante. Marco tamién fala d’una necesidá de «apertura real hacia nueves músiques y xéneros, evitando la clasificación altiva sobre la so calidá musical». Proponen, ensin duldes, una ventilación de la música académica pa dexar qu’entren otres corrientes que fai muncha falta.
«Fai falta una apertura real hacia nueves músiques y xéneros, evitando la clasificación altiva sobre la so calidá musical»
Nel casu de que dalguién quiera esguilar penriba too esto, ¿ye posible facer realidá un proyectu propiu? Virginia rellata una situación qu’ella mesma vivió nos últimos meses de la so formación nel CONSMUPA y que puede tomase como paradigmática de cómo se reciben les iniciatives nel centru: «Cuando tuvi que preparar el recital final de carrera quería trabayar un bon espectáculu, facer notes al programa y desplicales, filar el repertoriu, xugar cola illuminación, interpretar dalguna obra un poco distinta… De too eso, namás pudi enchufar un focu nuna obra na que tocaba sola; nin falar nin filar nin atopar repertoriu nuevu. Non porque la mio profesora nun quixere, sinón porque’l departamentu frenó la idea. Consideraben que yo podía perxudicar a los mios compañeros -que tamién facíen el recital- si falaba y que, bueno, yera un esamen». «Diome muncho que pensar y reflexonar. Supuestamente nesi esamen evalúen si somos músicos merecedores del títulu, pero ¿somos músicos completos si nun sabemos desenvolvenos nun escenariu más alló de tocando’l nuestru instrumentu? ¿Somos músicos si nun sabemos preparar unes notes al programa del repertoriu qu’interpretamos? ¿Somos músicos si nun sabemos organizar un recital o un conciertu? Quiciabes somos executantes d’unes partitures, pero creo que nun somos músicos dafechu. Toos esos elementos son criterios que debieren premiase nun Conservatoriu Superior de Música, non anulase», añade.
«Cuando tuvi que preparar el recital final de carrera quería trabayar un bon espectáculu pero’l mio departamentu frenó la idea. Diome muncho que reflexonar. ¿Somos músicos completos si nun sabemos desenvolvenos nun escenariu más alló de tocando’l nuestru instrumentu?»
Pero entós, ¿quién pon les torgues: el profesoráu, l’Alministración, o’l modelu d’enseñu? «Un sistema burocráticu y inmovilista. Planes d’estudiu fechos por persones que nin entienden nin conocen el mundu artísticu fonderamente y, nel envís d’ordenar y sintetizar la enseñanza, mataron la creatividá en munchos casos», conclúi Marco. Él mesmu apunta, tamién, al profesoráu como un elementu fundamental pa qu’esa creatividá pueda espoxigar: «Habría dedicase más tiempu y esfuerciu a incentivar, motivar y valorar les manifestaciones artístiques y creatives que puedan surdir. Pero pa eso hai que tener profesores apasionaos con preparación, sensibilidá y calidá de percepción, non namás con titulaciones y papeléu vacu».
Ente toles perspectives mentaes, l’Alministración o la Conseyería apaecen davezu como ún de los focos del problema -por nun poner a disposición medios materiales suficientes o por caltener eses torgues al profesoráu-, pero ye Virginia quien apunta tamién a la responsabilidá del propiu centru y la so dirección. «La escoyeta d’asignatures y la manera na que s’imparten ye materia del centru. La implicación en que’l cuerpu de docencia se forme, qu’intenten siguir una llinia común o buscar dalgo d’anovación depende del centru y la so dirección. Siento que, a escepción de departamentos nos que tengo constancia de que se mueven, se formen y faen propuestes perinteresantes, la gran mayoría tán anclaos nuna manera d’enseñar tradicional y conservadora. Nun hai rellación ente les asignatures y la ufierta nun ye atractiva», desplica. ¿Podría ameyorar el CONSMUPA si la so dirección tuviere un proyectu de centru nidiu, afitáu y que pudiere -y quixere- defender énte l’Alministración?
«La Conseyería d’Educación apaez davezu como ún de los focos del problema, pero apúntase tamién a la responsabilidá del propiu centru. ¿Podría ameyorar el CONSMUPA si la so dirección tuviere un proyectu de centru nidiu, afitáu y que pudiere -y quixere- defender énte l’Alministración?»
¿Qué va pasar cola educación musical superior n’Asturies si sigue amenorgando la so calidá? ¿Podemos tener una escena musical asturiana fuerte y diversa al marxe del conservatoriu o son les instituciones d’enseñu les que tienen que lliderar la industria o, pelo menos, adaptase a la so realidá pa xenerar conocimientu y profesionales na vanguardia? Mesmo que na Universidá nun se contempla otra posibilidá que la de tener unes instalaciones propies cola cadarma pa poner y recibir clases o’l puxu pola investigación ye obligatoriu, el Conservatoriu Superior ha responder a esos estándares. Trátase de respetar los derechos de l’alumnáu de recibir una educación de calidá. ¿Cómo va espillir el formientu de la creatividá asina? Son munches les entrugues que surden al rodiu d’esti diagnósticu y poca la voluntá de quien ye responsable pa imaxinar, movilizar medios materiales y humanos y, a la fin, construyir un CONSMUPA meyor.
Suscríbite a les nuestres novedaes
