El discu de La Bandina’l Tombo yá ta en toles plataformes dixitales
La Bandina’l Tombo foi un grupu formáu por Marga Lorences (curdión y pies), Dolfu R. Fernández (vigulín y turullu), Pepín de Muñalén (flauta, cuyares y bombo) y Carlos Tejerina “Chiri” (contrabaxu). Nació cola intención de recuperar l’espíritu de los bailles que se facíen n’Asturies a la fin del sieglu XIX y a primeros del XX. Pa ello restolaron per archivos y cancioneros, amás de facer trabayu de campu entrevistando a informadores que tocaron en bandes asemeyaes. El so repertoriu ta formáu por pieces a lo suelto (xotes, saltones, muñeires, xirandiyes…) y poles nueves pieces a lo agarrao (polques, valses, mazurques, pasudobles…). Ye una música pensao pa baillar qu’en 2004 rexistró delles d’estes pieces nun discu homónimu asoleyáu por Tierra Discos y qu’agora yá se pue sentir en Spotify y nes demás plataformes dixitales.
