El festival Que Nun Apare enllena Samartín de música tradicional y contemporánea esti sábadu 11
Esti sábadu 11 de xunu’l Parque d’El Florán de Samartín del Rei Aurelio acueye la quinta edición del festival Que Nun Apare. Esti eventu entamáu pola asociación cultural L’Osu Xabaz lleva cinco años trabayando pola cultura urbana, xamaicana y asturiana nesti conceyu del Nalón y, tres de tar paraos a cuenta l’andanciu, vuelve a cellebrase. Como tolos años, la música n’asturianu va tar bien presente nel festival y nesta edición actúen la bandina de Blimea Cuatrolán, el tríu de música tradicional 6 Riales y la banda de mecigayu ska La Tarrancha. Amás va haber más actividaes rellacionaes cola cultura de raigañu.
Tola programación ye gratuita y ensin intención de llucru y asina la presenten dende la organización:
«Dende bien temprano, a les 11h de la mañana, el festival entamará cola apertura del mercáu con más de 20 puestos d’artesanía, ropa, productos llocales, comida,… Tres el pistoletazu de salida tamién entamen los xuegos tradicionales a cargu de 6 conceyos y hinchables gratuitos pa neñes y neños que van tar presentes mientres tol día. Al poco, Cuatrolán, bandina del conceyu, va amenizar la mañana y l’ambiente del parque cola so música tradicional.
Sobre les 13h van llegar a El Florán, un garrapiellu de scooters clásiques que van tener un requexu d’alcuentru nel festival, y pocos minutos dempués l’asociación Iniciativa pol Asturianu va facer una intervención pa repasar la situación de la llingua asturiana. Pa zarrar la mañana, hai sesión vermú-culete amenizada pol tríu femenín 6 Riales y los sos cantares populares asturianos.
Pela tarde, magar les 16h, arranca’l espaciu soundsystem coles pinchaes de Miguina Selektah, Lluis y lxs integrantes d’Allanai y Bassturias. A les 17.30h habrá una charra y taller participativu de Valtu, llucha tradicional asturiana, cola Lliga Celta d’Asturies.
Tres too esto, a les 19.30h dará entamu’l primer conciertu col grupu Banda Gitana quienes acercarán los ritmos del este y la música gypsy al parque d’El Florán. Y de siguío sedrá’l turnu del La Tarrancha, col que baillar a ritmu de cumbia, ska, rock, reggae o la música de raigañu.
Dempués de los conciertos, la música nun apara. Por primera vegada n’Asturies celébrase’l primer meeting de soundsystems asturianes. Dos sistemes artesanales de soníu colos qu’esfrutar de la meyor música d’influencia xamaicana que correrá de la mano d’Allanai Soundsystem, quienes tienen presencia nel festival dende la primer edición, y Bassturias Soundsystem, un colectivu nuevu que llega pisando fuerte».
