Yá ta equí xunu. Nunes selmanes s’enciende la foguera de San Xuan, arranca’l branu y con él una montonera de fiestes, festivales y conciertos per tol país. N’axenda de musicasturiana.com yá hai 30 actividaes añadíes ente les que destaquen festivales como’l Folk, Post-Folk de Llanes, los Alcuentros de Música Tradicional n’alcordanza d’Aurelio Argel, Que Nun Apare, o los conciertos de San Xuan, o les últimes actividaes del semestre progamaes por Asturies Cultura en Rede.
El vienres 3 de xunu arranca Folk, Post-Folk, ciclu dedicáu a la música tradicional y la so reellaboración qu’hasta’l 12 de xunu va enllenar Llanes de música’l país coles actuaciones de Calea, Paganéu Live, El Velcro, La Maramoniz, Burbús, Orquesta Céltica Asturiana y Felpeyu; amás de delles charres. Tamién el vienres 3 y 4 cellébrense en Soto Rei dos xornaes n’alcordanza del periodista fallecíu en 2008 Aurelio Argel. Nelles participen la Banda Gaites Soto Rei -organizadora del eventu-, José Manuel Tejedor y Dixebra, Cadorna y, ente otres actividaes, va haber taller de baille con Pau Santirso y María Vázquez y Nueche en Danza.
Completen l’axenda pa la primer selmana del mes Les Pandereteres de Fitoria nes fiestes de Granda y Baxel na cai Gascona n’Uviéu, el sábadu 4; y Eva Tejedor & Les Pandereteres en Trelles (Cuaña) y Fernando Valle Roso y Silvia Moreno en Noreña, el domingu 5. Tamién el martes 7 va tar La Maramoniz nel ciclu Encaja2 del Teatru Xovellanos de Xixón.
El sábadu 11 en Samartín del Rei Aurelio cellébrase’l Festival Que Nun Apare, nel que la música n’asturianu ta bien presente coles actuaciones de la bandina Cuatrolán, 6 Riales y La Tarrancha. Tamién esi día la cultura de raigañu y, sobre manera, la pandereta va tomar La Guarida del Cunqueiru de Trabáu (Degaña), con una xornada dedicada a esti instrumentu y delles actividaes que van facer baillar a la xente hasta que’l cuerpu aguante.
Dientro de les otres actividaes programaes por Asturies Cultura en Rede, el circuitu de cultura en vivo entamáu pol Gobiernu del Principáu d’Asturies, tán l’actuación d’Anabel Santiago en Candamu (vienres 11), la de Slum Suit en Grau pa presentar el so trabayu nuevu La Casa Vieya (vienres 17), David Varela con Restolando en Llaviana (vienres 24), el gaiteru Celso Díaz en Carreño (vienres 24) y Calea n’A Veiga y Tinéu (17 y 25 de xunu).
Fiestes y San Xuan
A falta de conocer la progamación completa de fiestes destacaes como les de San Xuan en Mieres y San Pedro en La Felguera, les fiestes d’El Regueral en Carreño van cuntar cola actuación de Skama la Rede’l 18 de xunu y les de fiestes Carbayín con Les Pandereteres de Fitoria’l domingu 19. Na nueche de San Xuan, na qu’hai vezu de que se programe música n’asturianu a lo llargo’l país, tán confirmaes les actuaciones de Dixebra y Vicente Díaz en Tresona (Corvera) y Baxel na recuperada foguera de Caravia que se fai’l 25 de xunu.
Suscríbite a les nuestres novedaes
