Seis años dempués d’asoleyar el so primer trabayu, LaKadarma vuelve al estudiu de grabación. L’agrupación asitiada en Piloña ta estos díes ente los estudios Tutu de Corvera y OVNI de Llanera grabando los dos primeros temes d’un trabayu nuevu qu’aseguren va ser más maduru, centráu na composición, con bastantes collaboraciones y del que tovía nun hai fecha de publicación porque va dir cocinándose a fueu lentu.
«Tamos nun momentu de madurez pa l’agrupación que nesti 2022 cumple diez años d’andadura y el discu va caltener les premises que tenemos dende la fundación: un espíritu anovador en cuantes a la manera d’entender la música pa gaita asturiana, a les formes d’arreglar, a les instrumentaciones, y a probar coses nueves y nun zarrase a nada», comenta Rodrigo Joglar, director de la formación. Sicasí, el músicu esclaria que tuvieron una época na que facíen coses más «irreverentes a nivel de repertoriu, de versiones de coses populares» y qu’agora la prioridá ye centrase na «composición propia y na reellaboración de la música tradicional», atentiendo tamién a «los gustos y a la participación» de toles persones que formen LaKadarma.
Nesti sen, Joglar adelanta dalgunos de los detalles que van caracterizar al próximu trabayu de l’agrupación: «Vamos tener bastantes collaboraciones de xente que de dalguna manera ta vinculada con nós a nivel musical; va haber dellos temes cantaos y tamién de nueva composición… son munches novedaes que tovía nun podemos desvelar». «L’otru discu pretendía espeyar un poco lo que ye una actuación convencional de la banda y foi una grabación maratoniana; esti ye muncho más pensáu y vamos grabalu con otros planteamientos de trabayu diferentes», matiza’l músicu.
Espectáculu y llanzamientu
«El discu taba planificáu que s’entamara a grabar n’abril de 2020 y tamos en xunu de 2022», llamenta’l director de LaKadarma. L’andanciu retrasólo too, asina que los ritmos de la grabación tán adaptándose a la realidá de reactivar un proyectu que tuvo cuasi dos años paraos: «tamos grabando les dos primeres pieces, y vamos dir grabando más poco a poco a lo llargo d’esti añu y posiblemente parte del que vien. Entós pel momentu nun hai fecha de salida».
Amás del discu, la intención ye tamién «facer dalgún tipu d’espectáculu pa ofrecer esti nuevu álbum y acompañalo d’una nueva estética». Sicasí, Rodrigo Joglar matiza qu’eso va tocar dempués de rematar tola producción musical porque «facer una cosa d’esti tipu tien un trabayu y un esfuerzu de medios y humanu mui grande». Asina ye como pasín a pasu LaKadarma va faciendo un camín caracterizáu por amestar frescura, tradición, y agora tamién madurez.
Suscríbite a les nuestres novedaes
