Esti domingu 17 de mayu Bango vuelve a los escenarios. Esti gaiteru que trabaya con estilos como’l folk, el rock, el hip hop, la música celta y la new age va xubir a les siete la tarde al escenariu del Teatru Auditoriu de La Pola Siero pa facer un adelantu del que será’l so segundu discu de llarga duración; un álbum que da continuidá al so estrenu discográficu, Soul Dream, y a una carrera artística qu’entamó en 2021 col llanzamientu del single ‘Raíces‘.
«Los temes del próximu discu incorporen instrumentos nuevos y tienen un soníu más épicu y envolvente en xeneral», destaca Pablo Bango. Tamién sorraya que nel so trabayu nuevu va haber «pieces n’asturianu», amás de «llingües más vieyes, como’l protocelta, inspiraes nos antiguos pueblos astures». Les igües sinfóniques tamién tan presentes nun discu nel que «cada tema foi concebíu como un capítulu dientro d’una narrativa sonora que caleya ente la escuridá y la lluz, la guerra y l’amor, lo ancestral y lo humano».
Asina ye como’l conciertu d’esti domingu preséntase como un «espectáculu hipnóticu y épicu, onde la lluz y oscuridá, el raigañu y la moderndá fúndense nuna esperiencia qu’espierta lo ancestral y fai alcordanza, a traviés de la música, de quién fuimos y pa ónde vamos». Too ello con una instrumentación na que que «voces, flautes, gaites y percusiones conviven con testures electróniques, ritmos tribales y armoníes sinfóniques«. Les entraes yá tán a la venta por 15 euros.
Suscríbite a les nuestres novedaes
