Dempués d’una temporada ensin xubir a los escenarios, esti domingu 17 de mayu Guieldu tornen a los directos. La banda de música celta y folk progresivu va actuar dientro de la programación Mercáu Tradicional de San Isidro en Posada. El conciertu ye a les 20h, con entrada llibre, y tien llugar na carpa del parque Cuno Corquera, asitiada na capital del conceyu Llanera. Ye la primer de les cuatro feches que’l grupu anunció pa esta primavera y branu.
Amás del conciertu d’esti domingu, esta xoven formación tamién va tocar n’Asturies el 25 de xunetu; concretamente en Xixón, anque entá nun anunciaron l’escenariu. Les otres dos actuaciones van ser n’eventos internacionales: el 4 de xunetu lleven el so directu a Arpitania (territoriu asitiáu en Los Alpes, repartíu ente los estaos francés, italianu y suizu) y el 26 de setiembre a Cataluña.
Guieldu ye una de les bandes más destacaes de la fornada nueva de folk asturianu. Formáronse en 2019 y el pasáu añu publicaron el so primer discu, Memories de Deva, un álbum formáu por catorce temes que percuerren los soníos de raigañu del Arcu Atlánticu, amestándolo a otros estilos como’l folk progresivu, la new-age, el folk rock, el funk o’l smooth jazz. El cuidáu trabayu entemez temes de composición propia y d’orixe tradicional nel que suenen muñeires, dances, reels, xirandiyes, set irlandeses… Lo qu’ellos definen como «los soníos más tradicionales de los finisterres atlánticos d’Europa», poniendo especial enfotu n’Asturies y siendo Avilés el puntu de partida d’esti viaxe interceltista.
En directo’l grupu tien una propuesta enérxica y yá tienen llevao el so repertoriu a los eventos más importantes del xéneru como los festivales intercélticos de Lorient, Ortigueira, Avilés o Reinu de Llión; la Folixa na Primavera, Válgame Fest, Semando Fest, Folkmillas… ente munchos otros de dientro y fuera d’Asturies. El conciertu d’esti domingu ye una oportunidá nueva pa poder sentir en vivo la fuercia d’esta banda.
Suscríbite a les nuestres novedaes
