Esti vienres ye’l Día Internacional de la Llingua Materna y, como ye vezu dende va unos años, la Conseyería de Cultura, Política Llingüística y Deporte entama delles actividaes pa festexalo. Teatru, audiovisual, esposiciones, talleres, premios, cuntacuentos y alcuentros dan forma a una programación que va desenvolvese per tola xeografía asturiana. La música va tar presente cola actuación de Toyemerendas el sábadu 22 a les 17h nel Auditoriu de Tapia y tamién cola participación de David Varela en dellos espectáculos teatrales.
Toyemerendas ye un tríu musical del Eo-Navia qu’apuesta pola recuperación del repertoriu instrumental d’acordionistes y tocadores de vientu madera y metal de la zona, asina como de temes populares cantaos en gallego-asturianu. El so nome vien de «cómo se conoz nel occidente d’Asturies a la planta ‘Crocus Serotinus’ y la so propuesta «entemez ritmos tradicionales asturianos con otros qu’aportaron dende ultramar a partir del procesu migratoriu a Llatinoamérica y la llegada de la radio», desplica Abel Pérez, componente del tríu.
La banda ta formada pol mentáu Pérez a l’acordión (musicólogu, promotor cultural y exmiembru de formaciones como Darbukka, Folkgazais o Foxnola); Ruth Martín a la voz y pandereta (excantante de Folkgazais y Foxnola) y apocayá incorporóse Vero Rubio, multiinstrumentista con raigaños nel suroccidente asturianu qu’algamó’l Premiu Camaretá en 2023.
L’actuación de Toyemerendas ta enmarcada na presentación del documental NÍA (Nosoutras Ideamos Arte): Muyeres, tradición y novas ruralidades que cunta les vivencies de varies xeneraciones de muyeres y el so venceyu cola llingua propia y el territoriu. La componente del tríu Vero Rubio foi la encargada de pone-y Banda Sonora Orixinal a la obra con temes propios suyos y versiones de pieces de la fastera reinterpretaes cola trompeta. Too esto va sonar col conciertu d’esta formación el sábadu a les 17h nel Auditoriu de Tapia.
Suscríbite a les nuestres novedaes
