El grupu de jazz de raigañu Slum Suit graba’l so tercer EP
Tres llanzar en 2017 l’EP ‘Slum Suit‘ y en 2019 ‘Ida y Vuelta‘ -col que tuvieron nominaciones nel Premiu Camaretá al Meyor Cantar y nos Premios AMAS-, la banda de jazz de raigañu Slum Suit volvió esti fin de selmana al estudiu de grabación pa rexistrar lo que va ser el so tercer EP, ‘La Casa Vieya‘. Nun estudiu móvil montáu na Escuela de Música de Grau por Alejandro Lafuente “Lafu“, esti cuartetu grabó seis temes qu’asoleyarán previsiblemente en marzu d’esti añu.
«Nos anteriores trabayos construíamos too sobre melodíes orixinales. Nesti decidimos garrar melodíes populares y montar tolo que nos apetecía sobre elles. Garramos cantares perconocíos y otros que quedaron un pocu más escaecíos» , comenta’l gaiteru y saxofonista Carlos Casado, cabezaleru de Slum Suit, sobre esta grabación. Al empar, matiza que de los cantares más conocíos nun quieren «facer una competición de cuál ye la meyor versión», sinón reflexar «lo interesante de ver como cada persona o banta tien diferentes idees sobre la mesma “materia prima”».
D’esta manera, ‘La Casa Vieya’ va tar formáu por cinco arreglos de Slum Suit y una versión d’un tema asturianu de Pedro Iturralde, reputáu músicu jazz al que tán homenaxeando col espectáculu ‘Siguiendo’l Camín d’Iturralde‘. Nesta grabación, la formación ta renovada y d’ella formen parte xente veterano de la escena jazz: Xaime Arias al pianu, Eva D. Toca a la batería, Óscar Santos al baxu, amás del propiu Casado y Aida Suárez, que collabora nun tema a la voz y el panderu. «Queriemos grabar toos xuntos a la vez, pa que fuera lo más paecío a un conciertu», descata’l gaiteru y saxofonista sobre esti EP col que busquen «esperimentar col puntu de partida de la música asturiana» y que va ver la lluz en formatu CD y en plataformes dixitales.
