Otru añu más el pueblu llaniscu de Porrúa acueye dos de los eventos más destacaos del so calendariu cultural del branu: el Llaciniegu, la romería del Llacín y Porrúa en Bolas. La primer d’estes feches va celébrase esti sábadu 4 de xunetu y nella van actuar la Banda Gaites y Bandina de Llacín, Grupu Etnográficu L’Oriente, L.lariega, Abéu y Los Vicentos. Al fin de selmana siguiente ye Porrúa en Bolas y el domingu 12 actúa Odón del Paganéu.
La programación musical de Llaciniegu, la romería del Llacín arranca esti sábadu a les siete la tarde con una actuación de la Bandina de Llacín. A les 19.30h hai un taller de baille tradicional, a les 20.30h acúa la Banda Gaites Llacín y a les 21.30h el Grupu Etnográficu L’Oriente. Los conciertos de formaciones de fuera del conceyu Llanes van ser a les 22h el de L.lariega, tríu nuevu de música tradicional con repertoriu del occidente; a les 23h Abéu, formación xixonesa con repertoriu popular pal baille iguao con un soníu actual que ta presentando’l so primer discu K-MUDAR; y a la medianueche Los Vicentos, bandina cabraliega qu’interpreta temes tradicionales y de composición propia.
Per otru llau, del 9 al 12 de xunetu celébrase la sesta edición del festival d’intervención artística en boles de silu Porrúa en Bolas. Ente les distintes actividaes programaes, la música asturiana va tener protagonismu otru añu más colos conciertos del Vermú en bolas, actividá qu’entama a la una del mediudía del domingu 12 y na que va actuar Odón del paganéu cola so propuesta d’asturianada na que tamién pue sentise la influencies d’otros soníos más actuales.
Toles actividaes tienen entrada llibre y van desendolcase nel prau de Llacín, asitiáu xunto al Muséu Etnográficu de L’Oriente, na llocalidá llanisca de Porrúa. Con estos eventos esti pueblu caltién el so compromisu cola cultura tradicional del país, la dinamización de delles manifestaciones culturales y la xeneración de comunidá ente’l vecindariu y persones qu’aporten a estes cites llegaes dende otres partes.
Na semeya, actuación d’Alicia Villanueva y Luis Pola na edición de Porrúa en Bolas del 2025.
Suscríbite a les nuestres novedaes
