El branu asturianu sigue sumando feches de festivales. Hai unos díes anuncióse la novena edición d’A Veiga Rock, eventu que lleva’l próximu 1 d’agostu los soníos stoner, punk, folk, hardcore, metal… al recintu ferial d’esti conceyu del Navia-Eo. Dientro de la programación hai representación del rock fechu na llingua d’esi territoriu gracies a l’actuación d’Amarradizo.
Amarradizo ye un grupu de stoner rock formáu en 2022 por cinco componentes esperimentaos n’otres bandes. En 2024 asoleyaron el so primer trabayu, Lucha de Miedos, nel qu’inclúin trés temes en gallego-asturiano: ‘Nel Furao (Lonxe)’, ‘Tolura’ y ‘Botarme al monte’. D’esti últimu llanzaron l’añu pasáu un videoclip pa poner son a un cantar influenciáu por grupos como Red Fang, Kveterlak o Foo Fighters que cuestiona’l ritmu de vida de la ciudá visto dende’l mundu rural.
El 1 d’agostu a poder vése-yos nel Recintu Ferial d’A Veiga dende les 21h y con entrada llibre dientro del A Veiga Rock, festival nel que van compartir escenariu colos asturianos Onza y coles bandes El Reno Renardo y True Montains.
Suscríbite a les nuestres novedaes
