Pleibéricos acueye un especial de presentaciones de llibros y tesis doctorales dedicaes a la música’l país

Los Estudios Asturianos de calter académicu siguen ganando espacios. Esti xueves 28 a les 19h Pleibéricos -una plataforma que lleva dende 2020 entamando presentaciones online de llibros d’estudios ibéricos- organiza, per primer vegada, una xornada dedicada a los Estudios Asturianos. Nella la música’l país va tener un papel destacáu porque, de los trés llibros y cuatro tesis doctorales que se van presentar, dos son obres dedicaes esclusivamente a la música y n’otres dos, tienen presencia.

El llibru Diarios de Panderetera de Leticia Baselgas y la tesis de Llorián García, Acustemoloxía de la nueche en danza, son les dos obres centraes na música asturiana que se presenten en Pleibéricos. Amás d’esto, Eva Álvarez Vázquez presenta la so tesis –El lado más oscuro de la modernidad española: desindustrialización y narrativas culturales contrahegemónicas– que, na so parte final, analiza la figura de Rodrigo Cuevas nun capítulu entituláu Repensar e imaginar desde la ruina: futuros alternativos de comunidad e interdependencia. La estaya dedicada al axitador folclóricu tien por nome Rodrigo Cuevas: Manual de la vida (cuir) en el rural y completa una tesis qu’Álvarez defendó esti marzu na University of Massachusetts Amherst algamando una nota equivalente al cum laude.

Na xornada d’esti xueves de Pleibéricos tamién se presenta’l llibru Estudios Asturianos en el siglo XXI -coeditáu por Isabel Álvarez Sancho, Covadonga Lamar Prieto y Miriam Villazón Valbuena, de SAnTINA Asturian Studies- qu’inclúi un capítulu de Llorián García entituláu Los estudios asturianos de soníu. Como recueye’l resume del testu, nél, el gaiteru y musicólogu «propón lo aural como campu de renovación transversal del asturianismu contemporáneu» y presenta a «lo aural» como «una noción más amplia que la d’oralidá que permite estudia la potencia de lo sonoro como fuercia de tresformación«.

Con esta xornada amuésase como la música asturiana ta mui presente nos estudios universitarios y cómo los Estudios Asturianos van xenerando cada vez más interés ente delles comunidaes académiques de fuera d’Asturies. Quien tenga interés en siguir online la xornada de Pleibéricos pue facelo a traviés d’esti enllaz esti xueves a les 19h.