Otru añu más aporta La Peruyanza y La Pitanza del Sociu a Les Arriondes. El vienres 29 y sábadu 30 de mayu la Sociedá La Peruyal organiza nel Parque La Llera esti eventu na que la música’l país tien muncho protagonismu. Na edición d’esti añu participen Ruxideres, María Trubia & Pau Santiso, Los Muíles y Santi Galguera.
La Peruyanza arranca’l vienres 29 a les 19h con un taller de baille tradicional que va poner Santi Galguera, director del Grupu Etnográficu L’Oriente. Llueu d’una espicha «de traxe», ye’l momentu de la «verbena popular» na qu’a les 21h actúen l’agrupación llocal de pandereteres, Ruxideres, y María Trubia & Pau Santiso, dúu de música tradicional pal baille. Estos últimos incorpórense a última hora al cartelu, tres de tener que suspendese l’actuación de Pandereteros d’Anguañu por motivos de salú.
El sábadu 30 ye La Pitanza del Sociu y, amás de xinta popular y verbena con DJs, va haber música’l país cola actuación de la bandina del oriente Los Muíles pal vermú. La cita ye a les 13h con entrada llibre, como tola programación que desendolca esta asociación que dende hai 76 años desendolca les Fiestes del Bollu de Les Arriondes cada caberu fin de selmana de xunetu.
Suscríbite a les nuestres novedaes
