Grana, semiente y futuru. Eses son les conclusiones d’una tercer edición del Semando Fest, que volvió escosar les entraes díes enantes del eventu. Y ye que’l festival de música asturiana pa xente mozo ye yá un habitual nel calendariu d’iviernu n’Asturies. Tanto que, magar de tenese programaos una montonera de conciertos de renome mientres el mesmu día, el llenu de la Lata de Zinc foi ablucante.
Pero’l Semando Fest nun empecipió esti añu como otros. L’añu 2025 venía cargáu de noticies. La primera d’elles, la inclusión d’un formatu nuevu, la Semando Folk Session. Esta iniciativa que vio la lluz nel chigre L’Esperteyu consistió nuna jam session de folk pa xente menor de 35 años, con un resultáu bien bonu: más de 15 mozos y moces tocaron al mesmu tiempu nel icónicu chigre uvieín mientres más de 3 hores, con una mayoría de músiques muyeres y onde la media d’edá rondaba los 25 años. Ente los temes interpretaos, sonaron pieces del repertoriu tradicional, amás d’otros cantares de grupos como Felpeyu o L-R. Una bona noticia más pal futuru de la música tradicional.
«Con Abéu y cola so música afecha pal baille, les primeres fileres de bailladores apaecieron na sala, onde pudo vese una conexón interxeneracional pal baille»
La segunda noticia importante no que cinca al Semando Fest foi la qu’implicaba al so director, Xicu Ariza. El xestor del eventu y tamién director de musicasturiana.com anunció que la tercer edición diba ser la última de so, faciendo cumplir los valores del Semando y dando relevu a la xente más mozo, non solo músicos y músiques, sinón tamién a xestores y programadores culturales.
Yá na xornada del sábadu, la Lata de Zinc vistióse col mecigayu de bayura pola que destaca la música asturiana. Poco más de les 21 hores entamaba la tercer edición d’esti festival cola presentación d’Héroes ensin nome, conformáu por Yedra Riesgo y l’escritor d’esta crónica, y faciendo un allegatu pola importancia de defender la sanidá pública. Too ello tres esplicar la presentadora les circunstancies que-y llevaren a tener que pasar per quirófanu y que casi impide que tuviere ellí.
«L’artista multidisciplinar de Siero, Ferla Megía, amosó un trabayu impecable dende l’autoxestión»
La primer banda que xubió al escenariu de la Lata de Zinc foi Abéu, el grupu colos componentes más mozos d’esta edición. Con una formación renovada y con nuevos ritmos, el grupu xixoniegu presentó a lo llargo de siete cantares el trabayu nel que vienen afondando nestos últimos meses, dando una vuelta a lo que ya teníen fecho enantes. Con ellos y cola so música afecha pal baille, les primeres fileres de bailladores apaecieron na sala, onde pudo vese una conexón interxeneracional pal baille. Abéu presentó asina un soníu más frescu y con más puxu, que podremos ver nun discu futuru nel que tán trabayando con procuru.
Tres d’ello, y ensin dexar a un llau’l baille, Ferla Megía xubió a los escenarios con un espaciu tremáu d’instrumentos. L’artista multidisciplinar de Siero amosó un trabayu impecable dende l’autoxestión y con estilos que quiciabes enxamás se vieren na música asturiana, implicando amás al públicu en cada cantar. El músicu esplicó tamién qu’esa creación dende’l so propiu estudiu en casa permite-y esplorar soníos y estilos y que, si tuviere que facer lo mesmo nun estudiu de grabación esternu, sedría imposible. Con Ferla sintióse na música asturiana ritmos que van dende’l dembow al trap pasando pela lletrónica. Y too ello ensin dexar a un llau la música de raigañu. Una propuesta músical que vien medrando y que promete ser una de les más rompedores na escena.
«Alienda fixo un repasu a la so trayectoria musical, onde nun faltaron cantares que, magar de la so mocedá, yá formen parte de la historia de la música folk asturiana»
Yá nel ecuador del Semando Fest, aportó’l momentu d’Alienda y el so folk, non ensin antes de que Xicu Ariza xubiera al escenariu. Dende ellí, dexó a les clares la importancia de la música asturiana, mesmo que la del sofitu qu’han tener les industries culturales, sobre manera al traviés d’una profesionalización real. Con ello, despidíase del Semando Fest, pesllando una dómina de tres ediciones que, ensin el so enfotu, probablemente nun esistiríen. Mención especial merez l’alcordanza a Damián Barreiro, el periodista que tanto dio a la cultura d’Asturies, con un sonoru aplausu qu’enllenó la sala.
Yá con Alienda nel escenariu, la banda más numerosa, con seis componentes, amosó’l trabayu que la xente mozo ta desendolcando anguaño col folk. Mientres 50 minutos, la banda maliaya fixo un repasu a la so trayectoria musical, onde nun faltaron cantares que, magar de la so mocedá, yá formen parte de la historia de la música folk asturiana, como son ‘Rucaúres’ y ‘Zanca de cabra’, el cantar escritu na variante l.lacianiega pol académicu Roberto González-Quevedo col que se presentaron al Premiu Camaretá nel añu 2023.
«Melandru reivindicaron qu’hai un relevu xeneracional na música asturianu, pero que pa siguir sofitándola tien qu’haber una planificación cultural real dende los organismos públicos y una oficialidá de les llingües d’Asturies»
Tamién dende Villaviciosa llegaba’l postrer grupu de la nueche, cambiando dafechu l’estilu de música que veníemos sintiendo. Melandru punxo n’escena el so soníu progresivu y esperimental entemecíu con soníos más tradicionales, dando a conocer un estilu al que tamos poco avezaos n’Asturies. Zarraben asina nueche na que tamién reivindicaron qu’hai un relevu xeneracional na música asturianu, pero que pa siguir sofitándola tien qu’haber una planificación cultural real dende los organismos públicos y una oficialidá de les llingües d’Asturies.
Col piesllu del III Semando Fest piésllase una dómina y ábrese una nueva con xestores culturales nuevos, dando relevu en toles estayes de la cultura y dexando nel aire la esencia de que la música n’asturianu ta viva y la mocedá puxa por ello.
Suscríbite a les nuestres novedaes
