El Semando Fest escosa toles entraes
El 4 de febreru la sala Lata de Zinc d’Uviéu va acoyer el Semando Fest, primer festival de música moza n’asturianu. Nél van participar Alicia Villanueva y Luis Álvarez Pola, dos de los nomes que protagonicen el relevu xeneracional na tonada asturiana; Loína, tríu acústicu de folk atlánticu; Algaire, banda de música tradicional fusionada; y Llevólu’l Sumiciu, dúu qu’amesta música electrónica y asturiana. Son distintos estilos pa reflexar la diversidá sonora de la música asturiana y con una característica común: tener componentes menores de 34 años. A falta d’ocho díes pa que seya l’eventu yá tán vendíes toles entraes; ye una amuesa más del interés que xenera la música’l país y del valor qu’aporta pa la propia escena que’l públicu pague por consumila
La iniciativa trata de puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; reivindica les sales de conciertos como un espaciu afayadizu pal exposigue de la música de raigañu y tamién ye l’eventu col que Musicasturiana.com quier festexar más de cinco años d’actividá. El festival ta entamáu por Musicasturiana.com y Ixuxú Cultura; y patrocináu pola Conseyería de Cultura, Política Llingüística y Turismu al traviés d’Asturies Cultura en Rede, por Caja Rural de Asturias, pol Conseyu de la Mocedá del Principáu d’Asturies, el Conseyu la Mocedá d’Uviéu y Puru Remangu.
Amás, siguiendo cola filosofía de da-y oportunidaes a les y los creadores xóvenes, toles persones implicaes nel Semando Fest son xente mozo, con edaes comprendíes ente los 18 y 34 años. D’esta manera, la diseñadora Cecilia Díaz encargóse de la identidá visual del festival y del diseñu de la cartelería; los presentadores del programa radiofónicu Héroes Ensin Nome, Yedra Riesgo y Raúl Alonso, van encargase de presentar l’eventu y entrevistar a los artistes enriba l’escenariu; y la fotógrafa avilesina Lucía Garó va facer les semeyes y el videu resume. L’equipu humanu y artísticu ye igualitariu, con 9 muyeres y 8 homes implicaes nel desencolcu de tol proyectu.
Relevu y públicos
¿Por qué la mayoría de músicos que toquen nos principales eventos de la música asturiana tienen más de 20 años de carrera al costazu? ¿La mocedá conoz la música de raigañu? Hai muncho alumnáu nes escueles de música tradicional, pero ¿por qué nun salen nuevos grupos d’elles? ¿Cuándo rompió aquella fola de tantos grupos folk que surdieron nos años 90 o de grupos rock que nacieron nos 2000? En definitiva, ¿Hai relevu xeneracional na música asturiana?. Estes entrugues y más son les que faen que surda la necesidá de desendolcar un festival como esti.
Amás, el Semando Fest quier abrir nuevos públicos pa la música asturiana. Al ser un eventu onde la mocedá ye la protagonista, busca que’l públicu más mozu conoza los soníos de raigañu d’Asturies y que puea ver como hai rapaces y rapazos de la so mesma edá creando cultura asturiana. Por último, supón un pasu más dientro de los 5 años de camín que Musicasturiana.com cellebra con esti eventu. Una trayectoria qu’entamó col llanzamientu de la tienda online y de la distribuidora dixital (2017), siguió cola creación del ciclu Amosando (2019) y cola reconversión de la web nel mayor portal dedicáu a la música n’asturianu y gallego-asturiano (2021).
Merca les entraes
