Dellos festivales asturianos dieron anuncia apocayá de les sos feches pa les ediciones d’esti 2025. Per un llau, l’eventu de música folk rock Válgame Fest va poner en marcha la so programación n’Arenas de Cabrales ente’l 9 y el 11 de mayu. Sicasí, avanzaron yá que’l sábadu 3 de mayu a les 13h va haber una charra sobre la presencia del pastoréu en coples y cantares recoyíos nel puertu cabraliegu.
El Zarréu Fest qu’entama AMA Asturies, pel so llau, va celebrar la so II Sestaferia Cultural nel Monte en Degaña y Ibias ente los díes 27 y 29 de xunu. La edición pasada cuntó con charres, proyeiciones, música tradicional y, ente otres actividaes, los conciertos de D’Urria, L-R, 6 Riales, Algaire y Dixebra.
L’Asociación Cultural Entaína Ribeseya acutó tamién el primer fin de selmana d’ochobre pa la que va ser la próxima edición de la Folixa la Sidre, un eventu qu’amiesta dende va años la cultura sidrera col apueste pola música asturiana y, especialmente, la tradicional y el folk. La cita va ser los díes 3, 4 y 5 del mes.
Suscríbite a les nuestres novedaes
