En menos de venti díes entama la tercer edición del Zarréu Fest, la «Sestaferia cultural nel monte»qu’axunta conciertos d’estremaos estilos y otres actividaes culturales a lo llargo de trés díes nesti pueblu del conceyu Degaña. AMA Asturies -organizadora del festival- ta acabante d’anunciar los horarios d’una programación protagonizada pola música n’asturianu colos conciertos de Felpeyu, La Tarrancha, Alienda, Otramiente, Los Trimendos y Pandereteiras de Cerréu.
El vienres 3 de xunetu los conciertos entamen a les 21.30h cola xoven formación de música tradicional de Cangas del Narcea Otramiente (21.30h), el grupu power-folk Alienda (23h), la propuesta d’electrónica-rock-folk de la trikitilari euskaldun Süne (00.30h) y la sesión Antifascist Bitches DJ Set a les dos de la madrugada.
Pal sábadu 4 la música entama dende les 12.30 con un vermú amenizáu pola bandina Los Trimendos y una sesión de DJ Caléndula a les 15.30h. Los conciertos de la nueche vuelven ser a les nueve y media y nellos toquen la formación llocal de música tradicional Pandereteiras de Cerréu, el míticu grupu folk Felpeyu, la banda mecigayu-ska La Tarrancha y DJ Chiguito.
Amás de música va haber esposiciones, rutes, paseos pel patrimoniu inmaterial cultural, mercáu, gastronomía, collaboraciones con otros colectivos y proyecciones como la de la del documental Y agora que lo baillen los rapacinos. Lo llixero n’Asturies de L’Andecha Folclor d’Uviéu, que ye’l domingu 5 a les 16h pa poner el ramu a la tercer edición d’esti Zarréu Fest.
Suscríbite a les nuestres novedaes
