La XLV Selmana del Folclor Astur, entamada pol Grupu Folclóricu y d’Investigación El Ventolín, vuelve convertir a La Pola Siero nun epicentru de la cultura tradicional asturiana con una programación variada que combina divulgación, música, teatru y baille. Esta cita, que se celebra coincidiendo cola tradición de los Güevos Pintos, ye unu de los eventos más importantes nel calendariu cultural del conceyu, con una clara vocación de tresmitir y dignificar el patrimoniu etnográficu asturianu.
Los actos entamen el llunes 6 d’abril na Casa de la Cultura cola presentación oficial de la selmana, baxo’l títulu “Los cantares de boda”. La xornada inclúi una charra a cargu de Fernando de la Puente Hevia, la entrega de la Insignia de Plata 2026 y la tradicional cestona, amás de l’apertura d’una esposición etnográfica que va poder visitase a lo llargo de los díes siguientes. Como ye costume, esta xornada inicial marca’l tonu divulgativu d’una programación centrada nun tema concretu de la cultura popular, siendo esti añu la música nos casorios.
El martes 7 d’abril la música y la tradición salten a la cai cola actuación del G.F.I. El Ventolín tres la bendición, na Plaza del Ayuntamientu, y un desfile pel centru de la villa cola participación del alumnáu de la so escuela de música y baille tradicional. Esta presencia nel espaciu públicu conecta directamente cola filosofía de la selmana, que busca averar el folclor a la ciudadanía. El miércoles 8, el programa treslládase al Auditoriu con teatru costumista asturianu, de la mano del Grupu de Teatru Carbayín, que va poner n’escena “Una de matrimonios”.
La programación sigue’l xueves 9 con una charra participativa de Marisol Alija sobre cantares y romances de comarques llioneses, y el vienres 10 cola presentación del discu “El son nos cantares de boda” del grupu NosOtrés. Estes actividaes refuercen el calter investigador y divulgativu del eventu, poniendo en valor la tradición oral y la so evolución nel tiempu.
El sábadu 11 d’abril, la XLV Selmana del Folclor Astur va zarrar col habitual Festival Folclóricu nel Auditoriu, onde van participar el Grupu Municipal Folklórico Sámara (Islles Canaries), la Escuela de Música Tradicional d’El Ventolín y el propiu grupu anfitrión. Esti actu final, presentáu por Esther Fonseca, supón el ramu a una selmana que, un añu más, reafita’l compromisu d’El Ventolín cola conservación, estudiu y difusión del folclor asturianu.
Suscríbite a les nuestres novedaes
