Presentáronse en xineru, en febreru llanzaron el so primer cenciellu, ‘Tierra de madreñeros’, y agora anuncien que’l so primer conciertu va ser el 10 d’abril. Cuévano, la «superbanda» formada por doce destacaos con intereses y trayectories mui diverses, van dar esta actuación de presentación les 21.30h y con entrada llibre nel llugar que los vio nacer, la Taberna Cuévano de La Pola Siero.
Cuévano destaca non namás por tener ser doce componentes, sinón tamién pola destacada trayectoria de la formación: Xuacu Amieva a la gaita; Julio Rodríguez -50 años menor que l’anterior- al bouzuki; Carlos Velasco y Alicia Villanueva como voces principales; José Alfredo Cordero, Maje Llames, Leti Cienfuegos y Alba Cuadra como coristes; Dani Álvarez como multiinstrumentista ;Chino «El Indio» a la guitarra; Simón San José a la percusión; Alex Petu al baxu y Iván Testón como lletrista y l’alma mater del proyectu.
Amás el grupu anunció tamién apocayá que «mui pronto va tar disponible en toles plataformes dixitales ‘L’Altu Nalón’, qu’usa una melodía bien conocía como ye la ‘Marcha Brañes’ del mayestru Xuacu Amieva, con lletra d’Iván Testón». «Naz dende la nuesa tierra y el sentir del Nalón», añadieron n’Instagram, onde compartieron un fragmentu del cantar.
Suscríbite a les nuestres novedaes
