En menos de 48 hores remata la campaña de crowdfunding qu’entamó Mapi Quintana pa financiar los sos dos próximos discos: Música Pa Tornar Páxaros y La Maramoniz. L’artista l.leniza yá algamó l’oxetivu de los 8.000 € colos que costear parte d’estos dos álbumes y pa celebralo asoleya en toles plataformes dixitales un single nuevu de La Maramoniz: «Zagaleja«.
«El cantar fórmenlu una melodía y una lletra que me pasó Cris Zagaleja, una amiga panderetera de Valladolid, estudiosa de la tradición y sobre manera de la pandereta», desplica Mapi Quintana. «Gustóme tanto la melodía y la lletra que dixi «esto pa mí», regalómela, púnxime a enredar, fici l’arreglu del pianu y el de les voces y la parte de percusión montóla Juanjo encima».
«Zagaleja» ye l’únicu cantar del discu que ta en castellanu y en pallabres de l’artista «ye’l tema de tol repertoriu que más nos presta a los cuatro componentes de La Maramoniz».
Publicación de los discos
Tres d’algamar l’oxetivu de financiación na plataforma Verkami, los discos de La Maramoniz y Música Pa Tornar Páxaros van ser una realidá y tovía queden dos díes pa siguir sofitando la campaña de crowdfunding. Los trabayos van asoleyar ente finales de mayu y primeros de xunu, y van tar acompañaos de dos conciertos de presentación, ún pa cada discu: Música Pa Tornar Páxaros el 9 de xunu nel Niemeyer d’Avilés y La Maramoniz el 17 de xunu Teatru Vital Aza de La Pola (L.lena).
Suscríbite a les nuestres novedaes
