La Sala Polivalente del Conservatoriu Superior de Música «Eduardo Martínez Torner» del Principáu d’Asturies (Uviéu) foi l’escenariu de la primer audición conxunta de la especialidá d’Instrumentos de la Música Tradicional y Popular (IMTP). Esti Grau Superior, implantáu apocayá, tien semeyances col que yá s’imparte nel Conservatoriu Superior de Vigo.
El conciertu didácticu tuvo llugar el 14 de mayu de 2025 a les 13.30h. Tres de superar dellos pilancos tecnolóxicos, entamaron a sonar les gaites de los estudiantes de dambos centros. Lloñe de tratase d’una audición cenciella retresmitía per Google Meet (y Instagram) d’un conservatoriu a otru, el proyectu TRAS(F)EGAR va muncho más allá, al formar parte d’una propuesta d’anovación educativa desendolcada a comuña por dambes instituciones.
«TRAS(F)EGAR ye una pallabra compartida pol gallegu y l’asturianu. Esta idea treslládase a la música a traviés de melodíes d’ida y vuelta, nes que s’interpreten obres del repertoriu gallegu por gaiteros asturianos y al revés»
TRAS(F)EGAR ye una pallabra compartida pol gallegu y l’asturianu: trasegar (asturianu) y trasfegar (gallegu) faen referencia al actu de camudar daqué de llugar o treslladase d’un sitiu a otru. Esta idea treslládase a la música a traviés de melodíes d’ida y vuelta, nes que s’interpreten obres del repertoriu gallegu por gaiteros asturianos y al revés. Amás, estes pieces foron trescrites pol propiu alumnáu, lo que favorez desenvolver habilidaes auditives, d’análisis y de trescripción musical.
L’actu entamó con unes pallabres de Rodrigo Joglar -docente d’IMTP nel CONSMUPA-, quien agradeció la collaboración de les sos homólogues del CSM Vigo, Xiana Texeiro y Lorena Freijeiro. Darréu, intervino la profesora Texeiro, dando pasu al aniciu del conciertu.
«Cada intérprete incorporó recursos estilísticos y ornamentaciones característiques col oxetivu d’averase fielmente tanto a les grabaciones orixinales como al estilu de los gaiteros tradicionales»
Víctor Bouza, alumnu del conservatoriu gallegu, abrió’l programa cola intervención de la ‘Alborada de José Rendueles’. De siguío, Rebeca Rebollo, dende Uviéu, presentó la ‘Xota de Soutelo de Montes’. Alexandre Labraña escoyó la versión d’Álvaro Fernández del ‘Floréu de Remis’, interpretada nel MacCrimmon en 2015. Dende’l CONSMUPA, Arsenio Ruiz interpretó la ‘Foliada de Luxán’ de los gaiteros de Soutelo, acompañáu por Rodrigo Joglar. Uxío Dayán ufrió’l ‘Fandango’ del repertoriu de José Antonio Rodríguez.
Carlos Casado optó por ún de los xéneros más representativos de Galicia: la muñeira. Nesti casu, trátase de la ‘Muñeira no. 3’ de Os Dezas de Moneixas. Zarró’l conciertu Patricia Rodríguez, quien escoyó delles pieces del gaiteru Lliberdón que van formar parte del so recital fin d’estudiu nel Conservatoriu Superior de Vigo.
Tol alumnáu amosó gran solvencia técnica y un respetu fondu poles obres interpretaes, propies de la tradición de los sos «primos hermanos». Cada intérprete incorporó recursos estilísticos y ornamentaciones característiques col oxetivu d’averase fielmente tanto a les grabaciones orixinales como al estilu de los gaiteros tradicionales.
«TRAS(F)EGAR ye, penriba de too, un exemplu de cooperación y respetu mutuu, onde l’aprendizaxe conviértese nun procesu vivu, compartíu y significativu»
L’actu clausuróse con una semeya conxunta, símbolu del éxitu del proyectu y de la dualidá que define’l conciertu: un eventu que supo entemecer presencialidá y conexón a distancia, resolviéndolo con xeitu gracies a les TIC.
El conciertu didácticu nun supunxo namás una oportunidá pa compartir repertorios y reforzar el venceyu ente dos territorios de tradición musical fonda, sinón que tamién dexó constancia de cómo l’anovación pedagóxica pue abrazar la herencia cultural. TRAS(F)EGAR ye, penriba de too, un exemplu de cooperación y respetu mutuu, onde l’aprendizaxe conviértese nun procesu vivu, compartíu y significativu.
Suscríbite a les nuestres novedaes
