«La cultura nun ye un lluxu, ye un derechu. Por eso queremos que’l Zarréu Fest siga siendo de baldre, accesible y pa toes». Con eses pallabres presenten AMA Asturies la campaña de micromecenalgu pa financiar parte del festival y garantizar la continuidá del proyectu. La organización xuvenil pide un mínimo de 2.200 € y un máximo de 10.400 €, que va dir destináu a dellos gastos: sonorización, seguros y tases, lloxística, conciertos, y promoción.
Na edición d’esti añu tán confirmaes les actuaciones del grupu mecigayu-ska La Tarrancha, de los grupos folk Alienda y Felpeyu, de la banda de música tradicional del suroccidente Otramiente, de DJ Caléndula y de l’artista euskaldun Süne, col so proyectu qu’entemez electrónica, folk vascu y rock. Amás va haber otres actividaes como talleres, charres, mercáu, acampada y actividaes venceyaes al territoriu. Too ello ente’l 3 y 5 de xunetu en Zarréu (Degaña) con entrada de baldre.
Na campaña de micromecenalgu pueden consiguise distintes recompenses y formes de collaboración que van dende los 10 euros hasta los 100 euros.
Suscríbite a les nuestres novedaes
