Dende güei hasta’l domingu Uviéu acueye la Feria L’Ascensión, cita declarada d’Interés Turísticu Rexonal qu’axunta gastronomía, artesanía, actividaes pa la reciella, deporte tradicional, exhibiciones y música y cultura tradicional. Na edición d’esti añu va haber más de 15 actuaciones musicales repartíes ente’l Quiosco del Bombé y el recintu festivu -Plaza La Catedral, Plaza Porlier y cai Eusebio González Abascal-, amás del Desfile Folclóricu Feria de l’Ascensión que percuerre delles cais de la capital.
La programación musical entama güei vienres 30 nel Quisco del Bombé a les 13h con actuaciones corales programaes pola Federación de Coros de Asturias (FECORA). Nesi espaciu tien llugar a les 17h la primer xornada del Festival de la Canción Asturiana na que participen Esteban Verdeja Martínez, Marina Carbajosa González, Andrés Cueli Robledo y Maribel González Morán con Vicente Prado El Pravianu a la gaita y presentación d’Esther Fonseca. Tamién nel Bombé toquen Orquestina La Xarangana de 18h a 21h y el dúu post-folk L-R, mientres que nel recintu festivu van facelo de 18h a 20h la Real Banda de Gaitas Ciudad de Oviedo y la Banda Gaites Vetusta.
El sábadu 31 continúa nel Quiosco del Bombé a les 12h el Festival de la Canción Asturiana con Liliana Castañón Cerceda, José Manuel Robledo García Lolo Cabranes, Paula Prieto Castañón y César González Fernández, amás de la presentación de Fernando Valle Roso y la gaita de Diego Lobo Tuñón. A esa mesma hora’l Grupu Folclóricu Arduriu Pixuatu actuán nel recintu festivu y a les 17h toles agrupaciones de música tradicional d’Uviéu van protagonizar el Desfile Folclóricu Feria de l’Ascensión per delles cais. Les pandereteres Herbamora ponen el ramu a la xornada musical del sábadu col so conciertu a les 19h nel Quiosco del Bombé.
La programación remata’l domingu 1 cola Bandina Los Muiles actuando pel Bombé ente les 11.30h y 14.30h; la Real Banda de Gaitas Ciudad de Oviedo, Banda de Gaites La Laguna del Torollu y Grupu Folklóricu Trasgu nel recintu festivu de 12h a 14h; y l’espectáculu El Bosque de las Hadas del gaiteru Bras Rodrigo a les 18h nel Quisco del Bombé. La programación completa pue vese equí.
Suscríbite a les nuestres novedaes
