Ente 25.000 y 75.000 euros de subvenciones pa programar música y cultura na zona rural
La Conseyería de Cultura, Política Llingüística y Turismu ta acabante d’anunciar una nueva llína de subvenciones pa «ampliar y diversificar la ufierta cultural n’árees non urbanes». Asociaciones, empreses y instituciones pueden presentar proyectos hasta’l 30 de xineru pa estes subvenciones que pueden conceder un mínimu de 25.000 euros y un máximu de 75.000 euros, financiándose hasta’l 80% de cada proyectu seleccionáu.
El total del presupuestu pa estes subvenciones ye de 388.247 euros y ta financiáu dafechu colos fondos europeos Next Generation. Les ayudes van apoyar la organización d’eventos artísticos, festivales, esposiciones y otres actividaes en conceyos de menos de 30.000 habitantes y con una densidá de población inferior a 100 persones per kilómetru cuadráu. Van subvencionase eventos rellacionaos cola música, artes visuales, cine, audiovisual, teatru, danza, circu, lliteratura, arquitectura, diseñu y artesanía. Tamién actividaes d’educación, tresferencia y mediación artística y cultural, incluyendo l’usu de nueves tecnoloxíes.
Les bases y la demás información ta publicada nel BOPA, habiendo tres llínies subvenciones: 100.000 euros pa los proyectos promovíos por fundaciones, asociaciones y entidades non llucratives; 188.247 pa empreses y profesionales inscritos nel RETA; y 100.00 euros pa entidaes públiques. Los proyectos tienen que tar desendolcaos ente’l 1 de xineru de 2022 y el 30 setiembre de 2023.
.
