María Rosa Quero (Cirieñu, Amieva, 1950), conocida artísticamente pol nome de «La Pastorina», ye una de les voces más mítiques de la música asturiana. Principió a cantar tonada de bien moza y a presentase a dalgún concursu pa dase a conocer, pero col enfotu d’interpretar otru tipu de canciones. Fadríalo xunto al gaiteru Remis Ovalle, quien compondría pa ella nos años 70 éxitos como «Asturianos emigrantes», «Romanza de la pastora», «Voy a la villa de Llanes», «Pastorina cabraliega» o «Ya suena la gaita», bebiendo d’influyencies que diben de la tonada tradicional y los sones populares a la música llixera d’aquel tiempu.
Tamién tocaba la gaita, llegando a formar un tríu xunto a Remis y el so fíu, José Antonio; pero la so carrera como cantante fixo qu’esta otra faceta de la so actividá musical quedare nun segundu planu. Tuvo n’activo non munchos años, sicasí, el repertoriu conxuntu de María Rosa Quero y José Remis Ovalle convirtióse nun elementu de la memoria colectiva de varies xeneraciones d’asturianos y asturianes.
El documentu audiovisual qu’incorporamos al Archivu de la Música Contemporánea Asturiana (AMCA) ye una entrevista esclusiva na que fala de los sos comienzos, la so carrera, la so rellación con Remis Ovalle, d’anécdotes y curiosidaes del so trabayu y la so vida. Dellos momentos de la mesma emitiéronse na serie de televisión titulada D’ayeri a güei (TPA), apaeciendo agora íntegra y ensin cortes.
Suscríbite a les nuestres novedaes
