La inexistencia d’una categoría propia pa la música n’asturianu nos Premios MIN (Premios de la Música Independiente) y la nominación de Mejor Canción en Gallego/Bable nos Premios de la Música, yá tien respuesta por parte de la máxima autoridá cultural d’Asturies, Vanessa Gutiérrez. La conseyera de Cultura, Política Llingüística y Deporte reclamó, a traviés de dos misives unviaes a los presidentes de les dos entidaes, que l’asturianu tea n’igualdá de condiciones con otres llingües peninsulares nos dos certámenes d’ámbitu estatal.
«Queremos reconocer el papel esencial que los Premios MIN desempeñen dende 2009 na visibilización y fortalecimientu del texíu musical independiente nel Estáu, asina como la so contribución a la diversidá estética, creativa y territorial de la música actual. Precisamente, por esi compromisu cola pluralidá, quixéramos solicitar formalmente que nes categoríes de los Premios MIN s’incorpore de manera espresa la posibilidá de presentar obres interpretaes nes llingües propies d’Asturies -l’asturianu y l’eonaviego-, en condiciones equiparables a les existentes pa otres llingües del Estáu», espresó Gutiérrez na so carta a María Pellicer, Presidenta de la Unión Fonográfica Independiente (UFI) qu’organiza anualmente los MIN.
La conseyera de Cultura sorraya tamién que «llendar l’accesu namás a llingües oficiales xenera, na práctica, una esclusión de proyectos musicales que formen parte del patrimoniu cultural del Estáu y que desarrollen la so actividá profesional n’igualdá de condiciones creatives y artísques», y añadió que «la incorporación de les llingües propies d’Asturies ampliaría l’alcance cultural de los Premios MIN y reforzaría la so coherencia colos principios de diversidá y pluralismu qu’inspiren el certame».
Per otru llau, na carta dirixida a Luis Cobos Pavón, Presidente de la Academia de la Música de España, Vanessa Gutiérrez fai una doble reclamación: «solicitamos qu’en futures ediciones de los Premios de la Música se revise tanto la categorización como la denominación utilizada, avanzando hacia un modelu que reconoza de forma autónoma y col so nome correctu al asturianu y al eonaviego, garantizando asina la igualdá de tratu, la visibilidá del talentu musical y el respetu a la pluralidá cultural y llingüística».
La mandataria autonómica desplica na misiva que «el términu ‘bable’ resulta imprecisu y nun reflexa adecuadamente la realidá llingüística ni el consensu institucional existente al rodiu a la llingua asturiana», y nes dos cartes fai mención a la «base xurídica sólida» existente pal cambiu de consideración por parte de los organizadores d’estos gallardone: la Constitución Española, l’Estatutu d’Autonomía, laLlei d’usu y promoción del asturianu, la Carta Europea de les Llingües Rexonales o Minoritaries y a la Sentencia 75/2021 del Tribunal Constitucional que «reconoz l’usu del términu ‘llingua propia’ pa referise al asturianu, aun careciendo d’oficialidá».
«L’asturianu y l’eonaviego constitúin sistemes llingüísticos diferenciaos, con tradición lliteraria, musical y cultural propia, con un reconocimientu estatutariu y xurídicu qu’avala’l so tratamientu singular», argumenta la conseyera que propón na carta a los Premios de la Música «que les llingües propies d’Asturies cunten con una consideración independiente y específica dientro de los Premios, yá sea mediante una estaya propia o a traviés d’una denominación que nun les subsuma en categoríes compartíes».
Col unvíu d’estes cartes, la conseyera de Cultura, Política Llingüística y Deporte del gobiernu asturianu da respuesta a una reclamación de la escena musical n’asturianu, que venía criticando esta situación -como recueye esti editorial de MUSICASTURIANA.COM-, y comunicándose coles distintes entidaes con iniciatives individuales de varios músicos pa poner fin a una situación de desigualdá pa la música n’asturianu.
Suscríbite a les nuestres novedaes
