Arranca’l fin de selmana cinco cites protagonizaes pola asturianada, el baille tradicional y l’autoorganización de muyeres de industria musical. Grau, Piloña, Avilés, Xixón y Uviéu acueyen estos eventos ente güei y el sábadu.
Nel chigre La Maléfica de L’Infiestu a les 20h, Alicia Villanueva, una de les voces nueves de l’asturianada, va ufrir un repertoriu de canción asturiana acompañada d’Andrea Joglar a la gaita. Na Casa la Cultura de Grau la poeta y música Ana Lamela presenta’l so poemariu infantil nuevu nun recital onde entemez poesía y música. Por último, Ún de Grao actúa nel Café Cocolé d’Avilés cola so propuesta de tonada influenciada pol rock, jazz o bossa nova.
A les 11.30h en Les Cigarreres (Xixón) L’asociación estatal de Muyeres de la Industria Musical (MIM) organiza un conceyu abiertu p’amosar el so trabayu en defensa de la igualdá de xéneru nel sector musical y pa texer rede n’Asturies. Por último en Lata de Zinc (Uviéu), el colectivu tradicuir Les Pites entama un taller de pandereta, cantu y baille tradicional gallegu dirixíu por Eva Outeiro. Dempués del taller, hai una folixa gratuita con baille d’Asturies y Galicia.
Suscríbite a les nuestres novedaes
