Soníu, agua, infraestructura… pescanciar la llende

El testín que sigue foi escritu a costafecha pa ser lleíu nuna actividá de llectura colectiva curada pola filóloga Mar Martínez, la que tuvo llugar el pasáu 23 de febreru de 2023, nel arrodiu de la instalación sonora Catedral de la lluvia, de Juanjo Palacios, en collaboración cola Empresa Municipal d’Agües de Xixón, y espuesta nestos momentos en Llaboral Centru d’Arte y Creación Industrial. La obra en cuestión, de dos hores y media, ta dedicada a otra gran obra –non d’arte sinón d’inxeniería–: la construcción d’un gran poza soterrada nel arrodiu del parque de los Hermanos Castro de Xixón, al costáu d’El Molinón, dedicada a recoyer l’agua contaminao qu’arrastraba’l ríu cada vez que cayía un bastiazu. La hestoria d’esta poza de tormentes tien notoriedá na hestoria reciente del conceyu, pues vien poner un (caru) parche al problema de los vertíos fecales que, nos últimos años, inundaben la desembocadura’l Piles coles primeres riades, coinciendo en dalgún casu cola llegada añal del turista de branu. El fechu foi sonáu pola actitú negacionista col que s’abordó’l tema nos medios, lo que dio llugar a coñones reacciones populares de vecines y vecinos; ente elles, una chanciosa tonada de Km 0 compuesta pol músicu y cantante Ún de Grao, quien, dende l’altu Cimavilla, pudo divisar tala estroza. 

Tocante a la instalación en sí, trátase d’una mui trabayada composición d’arte sonoru, con apoyu visual, que recueye grabaciones de campu realizaes demientres se foi construyendo’l mentáu dique. Entemécense tamién los soníos de les primeres agüades que s’allugaron nél. Faise audible así, y documéntase, un valiosu patrimoniu sonoru de calter industrial del conceyu de Xixón. El testu qu’equí s’espubliza, una versión ampliada de lo lleío nel actu, xuega a «fabular críticamente» (Hartman 2008) cola esistencia d’una hestoria común ente’l fluyir del agua y de la sonoridá nel intre de la esfera pública asturiana. Tal hestoria d’asturfabulación imaxina críticamente a partir del puntu d’indistinción ente’l tipu d’emanación que ye’l ríu y aquella otra que ye la voz. Dao que la construcción del propiu pozu de tormentes vien sustituyir el trabayu de contención de les riades que perfacíen llugares güei enllenos de cementu y asfaltu, queda dedicáu esti testu a la memoria de les difuntes llamuergües, ecosistemes arrasaos pol urbanismu, y que poblaben el calce fluvial de La Comuña’l Muriel hasta nun va tanto. 

A la llamuerga de La Comuña’l Muriel, in memoriam

El soplu d’un álitu inesperáu, d’una llamuerga común, silente, conecta la hestoria espectral del soníu cola hestoria del agua. Como na disrupción sonora del shock, los contornos «fluctuantes» (Fantinato Géo de Siqueira 2018) del ríu tamién puen ser pensaos en virtú d’una doble perspectiva. Una, la más común, ye la que mos retrotrae a la esfera del control, del puru cálculu. La música y el soníu apaecen así como un conxuntu más o menos consensuáu d’aspectos medibles: tantos decibelios, tal númberu frecuencies, tantos bytes, tal númberu d’escuches; y lo mesmo pal agua: tantos metros por segundu, tal caláu, tal porcentaxe de bacteries fecales, y así. Esta manera de pescanciar les coses asitia’l discurrir de la música y del agua nuna nada inocente hestoria común. Ye la hestoria del control de la emanación corporal, vocal, del efluviu… que munchos dieron en llamar «biopolítica». 

Pero esta nun ye la única manera de ver les coses. Como señala l’arquitectu indú Dilip da Cunha, autor de La invención de los ríos (2018), nun hai, en verdá, una división clara ente tierra y agua que pudiéraos demarcar a priori; de la mesma manera que tampoco nun la hai ente silenciu y soníu, ente música y silenciu. Lo qu’hai, señala da Cunha, sería un determináu efectu de diseñu; o lo que bien siendo lo mesmo: un actu de creación mutual, siempre continxente, al traviés del cual esa frontera acaba por afitase como algo dao. Pero’l ríu ye muncho más que tal o cual manera de pescanciar la llende. Ye, en verdá, una multiplicidá d’elles, el resultáu d’una creación multiespecies infinitamente más complexa, la que mos devuelve’l desurdir dispersu de la humedá como un álitu más allá de lo humano, del «xeontopoder» (Povinelli 2016). Con que, más qu’una determinada «llinia» que va del puntu A al puntu B, como na cosmoloxía moderna, el ríu apaez nesta perspectiva como una fuercia del mundu, ente otres, indiferente a les nueses pretensiones de control, y que mos tienta a responder con procuru nel intre d’nuna intrincada «diplomacia xabaz» (Morizot 2016). 

La instalación sonora del nuesu amigu Juanjo Palacios, del proyectu Mapa Sonoru, debiéramos sentila, me parez a mi, más na segunda d’estes dos posibilidades, la que llama l’atención sobre aquello que fizo posible’l qu’una determinada partición tierra-agua se pudiera estabilizar. Como nos meyores heriedos de la esperimentación sonora, nun ye la celebración del llimite establecíu lo que más ameritaría pescanciar equí, sinón xustamente l’alteración fluctuante d’esa llende, siempre en tensión. Falamos entós d’una escucha estética de la poza que mos fae más capaces de sentir la materialidá d’un mundu que nun ye enteramente de nueso, y que fae audibles, en consecuencia, los llímites de la poza como una infraestructura demasiao humana; colos quites implacables del bastiazu, de la riada, de la «irrupción de Gaia» (Stengers 2009). 

Llorián García Flórez. Semeyes de Marcos Morilla

Bibliografía

Cunha, Dilip da. 2018. The Invention of Rivers: Alexander’s Eye and Ganga’s Descent. Pensilvania: University of Pennsylvania Press.

Fantinato Géo de Siqueira, Maria. 2018. «Arquivos flutuantes: escuta e densidade sonora no rio Amazonas». En Do arquivo á playlist: histórias, nostalgias, techologías. San Juan: IASPM-LA 231-239. https://drive.google.com/drive/folders/1benMKgNiumVwzNPpWVgo7dUKROcHBihJ 

Hartman, Saidiya. 2008. «Venus in Two Acts». Small Axe 12 (2): 1-14. (Torna al castellán disponible en https://hemisphericinstitute.org/es/emisferica-91/9-1-essays/e91-essay-venus-en-dos-actos.html#_edn1). 

Morizot, Baptiste. 2016. Les Diplomates. Cohabiter avec loups surune autre carte du vivant. Paris: Wild Proyect. 

Povinelli, Elizabeth. 2016. Geontologies. A Requiem to Late Liberalism. Durham: Duke University Press. 

Stengers, Isabelle. 2009. En tiempos de catástrofes. Cómo resistir la barbarie que viene. [s.l.]: Ned Ediciones.