Vuelve la Nueche en Danza d’Antroxu

Vuelve la Nueche en Danza d’Antroxu. Tres l’éxitu de la edición del añu pasáu, el colectivu de Nueches en Danza, LaKadarma, La Benéfica, Les Ablanes y l’Ayuntamientu de Piloña vuelven a entamala. El sábadu 4 de marzu L’Infiestu acueye esti eventu nel que va haber pasucais, taller de baille, concursu de mazcaritos y muncho baille y música’l país.

Les actividaes entamen a les 18h con un pasucais peles cais de L’Infiestu nel que van participar Los Sidros de Valdesoto, los Xigantes d’Entaína Ribeseya, los Cabezudos de L’Infiestu y la bandina “La Bilordiera“. Pa les 20h les actividaes treslládense a la Plaza Mª Xosefa Canellada y van entamar con un taller de baille coordináu pol etnomusicólogu llaniscu Santi Galguera, quien tien investigao sobre’l baille tradicional nel oriente del país, especialmente sobre la xota y lo llixero, amás de pertenecer a delles asociaciones de música y baille tradicionales.

Pa rematar la xornada ta’l concursu de mazcaritos, con premios individuales y colectivos d’ente 50 y 200 €, y la propia Nueche en Danza; esa «xuntanza de xente pa baillar, tocar y cantar ensin más pretensión que la de pasalo bien». que nació en 2015 y que foi afitándose hasta llegar a más de venti ediciones con cientos de danzantes revitalizando y dando puxu a la musica y el baille tradicional del país.

Mercar discos de pandereta na tienda online