Asturtralla ta acabante d’asoleyar la tercer y última versión n’asturianu d’himnos punk-rock. Tres d’entamar con ‘Asturies Insumisa‘ -cola que reinterpretaben ‘Zapatista’ de Dixebra– y siguir col ‘Nun somos nada‘ de La Polla Records; agora tóca-y el turnu a ún de los grupos cimeros del punk en castellano: Eskorbuto. El clásicu de 1986 que ta nel discu AntiTodo ‘Es un crimen’ agora yá ‘Ye un crimen‘.
«Eskorbuto siempre me prestó muncho y tienen una montonera de temes buenes. ‘Es un crimen’ encaxóme mui bien pa tornar al asturianu y parezme de los meyores temes que tienen, con una lletra mui directa», desplica Xelu Estébanez, cabezaleru d’Asturtralla, sobre’l por qué d’esta versión.
Tres de la publicación d’esta versión, la banda punk-rock va siguir llanzando temes nuevos. Los sos planes son «asoleyar un EP dempués de setiembre y enantes qu’acabe l’añu, en payares, dar un conciertu y llueu volver a dar más actuaciones», como comenta Estébanez.
Suscríbite a les nuestres novedaes
