Dempués de la publicación hai dos selmanes del so primer cantar, ‘Foles ermes‘, La Ciudá nel Mar llancen agora un tema nuevu en toles plataformes dixitales: ‘Lluminaria‘. La pieza da nome al que va ser el so primer EP -previstu pa que s’asoleye na seronda-; ye una composición propia con ritmu de muñeira; y, como desplica la vocalista Marina Pangua, escoyéronlo como single nuevu por «xugar col contraste ente la tiniebla, lo escuro, lo que manca, lo que duel, lo que da mieu inclusu… y la lluminaria como esa lluz misteriosa de daqué que tovía nun se conoz, pero que ta por venir y que va ser bueno«.
«La música ye pa baillar. Escoyimos un ritmu de muñeira y entós quedó un tema bien animáu», comenta Pangua sobre esta pieza que tresmite la esencia más folk d’esta formación na que la canción d’autor y l’indie-pop ta bien presente. Anque’l cantar ye de composición propia en música y lletra, tamién inclúi una melodía tradicional, «que ye’l trepeletré».
«En común col anterior cenciellu tien la búsqueda de l’armonía de les voces, la instrumentación -anque’l panderu tócase equí d’otra manera y tamién hai otru tipu de percusión-; y de diferente qu’hai una pieza tradicional pel mediu», plantega la lletrista, vocalista, guitarrista y percusionista del proyectu.
«Tamos mui contentes. Tenemos muncha gana yá d’entamar, de siguir sacando los temes nuevos y de dar conciertos y conocer a la xente que nos ta sintiendo tres de les plataformes musicales», valora Marina Pangua sobre los primeros pasos d’esta formación presentada públicamente l’abril pasáu. La próxima novedá va ser el 22 d’agostu, cuando llancen el tercer single del que va ser el so estrenu discográficu.
Suscríbite a les nuestres novedaes
