L’artista aragonesa Isabel Marco ye una de les voces del panorama estatal que más compromisu amuesa cola diversidá llingüística. En 2020 llanzó l’EP El Respirar de las Lenguas, nel qu’interpretaba un mesmu cantar nos distintos idiomas peninsulares pa reivindicar el mundu rural. Agora, vuelve a cantar n’asturianu en ‘Un deseyu estrañu‘ y fáilo amás arrodiada de dos destacaos nomes de la escena’l país: Mala Reputación y Alfredo González.
Mala Reputación xunten la so voz a la d’Isabel Marco, mientres qu’Alfredo González ye’l responsable d’adaptar la lletra al asturianu. Esta xuntanza nun ye casualidá: Marco y Mala Reputación caltienen una fonda amistá dende va años y davezu collaboren en directo; mientres qu‘Alfredo González foi teclista en directo d’Isabel Marco dellos años, acompañándola en decenes de conciertos per tol Estáu español.
Asina ye como l‘amistá y el venceyu con Asturies -l’artista aragonesa pasa llargues temporaes n’aldea ribeseyana de Calabrez-, dan forma a un cantar que «cunta l’amor de branu, cola so velocidá, la so pasión y la so fugacidá«, como presenten dende l’axencia de contratación de Marco, Alternativa Management. La lletra orixinal y la composición musical ye autoría de l’aragonesa y da como resultáu un mediu tiempu rockeru con pingarates pop y enllenu de matices. ‘Un deseyu estrañu’ supón tamién una oportunidá nueva pa sentir a Mala Reputación cantando n’asturianu, idioma nel que tienen asoleyao dellos de los sos temes.
Suscríbite a les nuestres novedaes
