Vuelven L-R. Dos años dempués de la publicación de N.O.S. el dúu post-folk torna -acompañaos del Coru Al Altu La Lleva– con «Anda Neña«, primer adelantu del so tercer discu que va asoleyar na seronda. «Esta xota ye un artefactu sonoru que pon nel puntu de mira un conceptu clave: la moralidá y el «qué dirán», comenta la banda na presentación d’un cantar que «incita a convertise, como diría David Bowie, en propios «héroes por un día» o pa siempre». Sobre ello falamos con Rubén Bada, guitarrista del grupu qu’acompaña a la voz y pandereta de Leticia Baselgas.
¿Cómo naz esti cantar y qu’intencionalidá tien?
«Anda neña» ye un tema compuestu por mí que sigue la filosofía de L-R de facer música pal baille. Gústanos muncho la folixa y la parte musical sigue la estructura de les xotes tradicionales asturianes pal baille. Ye una xota que se pue baillar.
En cuantes a la lletra la idea fundamental ye que nos gusta la música y la lírica popular, trabayamos por ello y sentimos un enorme respetu por too esto que nos vien dao y qu’en cierta midida ye nuestru, pero que tampoco nos pertenez; ye un patrimoniu colectivu y dalgo que tenemos que tratar con munchísimo cuidáu y respetu. Dicho esto, hai munches partes d’esa lírica popular que son estremadamente agresives, frutos d’otra sociedá qu’afortunadamente esperamos que tea cambiando. Y dientro d’esa lírica popular hai una cuarteta que diz «anda neña componte vamos pal baille, que si nun vas conmigo nun vas con naide», que paezme d’una violencia bastante cafre, sobre too porque siempre ta dirixida a la muyer. Entós queríemos ironizar con eso y actualizalo. Nun vamos a desechar el too porque haiga una parte que nun nos preste; nós contamos la nuestra historia, cola nuestra voz y cola nuestra perspectiva. Por eso cambiámoslo por «si nun te compones nun te quier naide», que ye tamién una crítica a la importancia que se da al aspectu, a la pinta, a cómo vamos, a que val más les traces d’ún a realmente’l valir d’esa persona. Entós va per ehí; de lo complicáu que ye convivir con según qué sectores cuando unu realmente cree que la sociedá pue cambiase, pue evolucionar y convertise nun sitiu maraviyosu onde cabemos toos y tol mundu pue vivir siendo lo que ye.
Anque paez que ye un cantar escuru -sobre too al principio- y pue paecer que la lletra tien un tinte pesimista o negativu, en realidá ye un cantar bastante optimista nel qu’hai muncha lluz al final. Porque al final, independientemente de como tean les coses, lo que facemos ye música pa la fiesta. Esto ye pa pasalo bien y ye lo que pretendemos.
¿Cómo surdió la collaboración col Coru Al Altu La Lleva?
Nel Coru al Altu La Lleva hai xente a la que conocemos dende hai munchos años. Colo que ye’l coru en sí coincidimos l’añu pasáu teloneando a Nacho Vegas -ellos son el coru que lu acompaña en directo-, y dempués del conciertu tuvimos comentando lo muncho que nos gustó y lo muncho que prestaría facer dalgo xuntos, tanto por ellos como por nós. Ehí saltó la chispa. Llueu volvimos a coincidir nel BBK Live porque tamién tocaba Nacho y dempués de los conciertos viendo a tolos grupos y tomando dalgo quedó’l tratu zarráu del too.
Y cuando tábemos grabando esti tema, al final yá cuasi de la producción -de fechu taba amestándolu yá-, vínome la idea de que molaba tener al coru cantando con esa cadencia eso de «Anda neña», que representa eses idees que se van perpetuando munches vegaes ensin nengún xacíu. Llueu al final yá ye too muncho más lluminoso, porque lo que queremos representar ye tolo contrario, que vamos de fiesta y vivimos la vida como la queremos vivir. Yera una collaboración hasta ciertu puntu inevitable y tamos mui contentos de cómo quedó, del procesu de grabación y creación y tamos mui agradecíos porque la verdá que mola muncho conceptualmente’l Coru al Altu La Lleva.
¿Cuándo va asoleyar el nuevu trabayu?
Agora vamos esparder esti cenciellu y la idea ye sacar ún o dos singles más enantes del branu, habrá delles sorpresines -esperamos- y el discu saldrá pa finales de setiembre o primeros d’ochobre.
«Anda neña» ta producida y amestada por Rubén Bada y masterizada por Sergio Rodríguez (Tutu Estudios). Acompáñase d’un videoclip dirixíu y producíu por Bada&Baselgas, col director de fotografía Xosé da Silva y con maquillaxe de Alegría G. Menéndez. D’esta manera L-R siguen afondando na so propuesta post-folk y siendo constantes nesi camín qu’abrieron en 2016 na cocina de so casa y que yá los llevó per escenarios prestixosos de la escena folk y indie.
Suscríbite a les nuestres novedaes
