Cola seronda aporten los amagüestos y, con ello, son distintos ayuntamientos y colectivos los qu’entamen dellos eventos nos que la música’l país ye la protagonista. El festival Vientu de Seronda en Lluanco, L’Amagüestu de La Benéfica de Piloña, el XXI Festival de la Seronda de Morea, la XXII Seronda d’Avilés y l’Amagüestu Candás ’25 son les cites que yá hai marcaes nel calendariu ente esti vienres 31 y el 8 payares.
L’aniciu d’estos eventos va ser esti fin de selmana nel Parque Zapardel de Lluanco. Ellí el Conceyu de Gozón entama per primer vegada’l Vientu de Seronda, un festival que col llema «sabores, tradiciones, bona música» va axuntar actividaes gastronómiques y pa la reciella y música en vivo. El vieneres 31 dende les 19.30h actúa’l grupu folk Matazúa; el sábadu 1 dende les 20h Skama la Rede y DJ Avante’l Pueblu; y el domingu 2 a les 13h el Grupu Folclóricu Ocle.
El sábadu 1 de payares tien llugar una de les cites más populares d’esti calter, l’Amagüestu de La Benéfica de Piloña. Esti espaciu cultural acueye delles actividaes dende les doce’l mediudía ente les que s’alcuentra una actuación musical de la Bandina Los Muiles. Esi mesmu día, a les 19h, nel Cine Teatru Carmen de Morea (Ayer) celébrase‘l XXI Festival de la Seronda nel qu’actúa Folclore Ayerán y el grupu de música y baile tradicional Tahúme d’A Coruña.
Yá pa la selmana qu’entra, el colectivu Xuntanza d’Avilés entama la XXI Seronda n’Avilés. Nel Mercáu d’Avilés Plaza de Les Aceñes actúen el vienres 7 Bandina Cuatrolán, Xaréu d’Ochobre, Escontra’l Raigañu y Algaire y el sábadu 8 Bandina, Grupu y Pandereteras Rebulir (Galicia), Bandina Los Collaínos y Alba Gutiérrez & L.lueñe.
Los eventos yá anunciaos rematen el 8 de payares col Amagüestu Candás ’25. Na Fábrica d’Ortiz de la capital carreñense van actuar el Grupu de Baille La Folixa de Carreño, Grupu de Baille San Félix de Candás y Banda Gaites Candás -estes trés agrupaciones tamién van facer un pasacáis pela villa- y 6 Riales. Tamién va haber xuegos tradicionales pa la reciella.
Suscríbite a les nuestres novedaes
