L’Ayuntamientu d’Uviéu, a traviés de la Conceyalía d’Educación y de la Escuela de Música Tradicional, dio-y esti añu’l Premiu Internacional de Folclore “Martínez Torner” al ex director del Festival Intercélticu de Lorient y xestor cultural, Lisardo Lombardía. D’esta manera’l xuráu reconoz el so llabor «en defensa de la música folclórica y la investigación etnográfica» y tamién rellaciona esta distinción, «cola candidatura d’Uviéu a Capital Europea de la Cultura 2031«.
Lisardo Lombardía Yenes nació en Llaviana en 1955. Foi ún de los fundadores del colectivu Belenos, grupu d’estudios etnográficos asturianos; creador y director artísticu de les Nueches Celtes d’Uviéu, del Festival d’Arpa Celta y del Festival Oviedo Folk durante los años 80-90. Dende 1985 venceyóse al Festival Intercélticu de Lorient, a lo primero como delegáu y llueu como director xeneral dende 2007 hasta 2021. En 1987 creó la empresa discográfica Fonoastur y desendolcó un trabayu intensivu de grabación y de distribución de música, cola producción de más de 150 referencies discográfiques ente les que s’alcuentren dellos de los discos más destacaos del folk y la música tradicional asturiana. Tamién dirixó’l Club Prensa Asturiana del diariu La Nueva España.
La so actividá bayurosa en defensa de la cultura asturiana y del interceltismu llevólu a recibir prestixosos reconocimientos. Dende 2009 ye miembru del Conseyu Cultural de Bretaña. En 2015 recibió la Medaya de Plata d’Asturies; en 2021 la de la ciudá de Lorient y del Institutu Cultural de Bretaña. Finalmente el Ministeriu de Cultura de la república Francesa nomólu como «Chevalier de l’Ordre des Arts et des Lettres». En 2022 tamién foi nomáu Académicu d’Honor de l’Academia de la Llingua Asturiana y recibió l’Urogallo Especial del Centru Asturianu de Madrid.
El 26 de payares va tener llugar la gala d’entrega d’esti premiu. El xuráu tuvo presidíu pol conceyal d’Educación y Seguridá Ciudadana, José Ramón Prado, y formáu pola conceyala delegada, Lourdes García; José Manuel Gutierrez, coordinador de la Escuela de Música Tradicional; Idoia Gonzalez, secretaria del Xuráu y xefa de serviciu d’Educación; y los profesores de la Escuela de Música Tradicional, Jonathan García (gaita) y José Llaneza (folclore).
La Escuela Municipal de Música Tradicional Asturiana, dependiente de la Conceyalía de Educación, convoca cada añu’l gallardón Eduardo Martínez Torner col oxetivu de reconocer el méritu de persones físiques, asociaciones o fundaciones que destaquen nel mundu de la música y baille tradicional, etnomusicoloxía, cultura de raigañu o investigación del folclor dientro del ámbitu internacional.
Suscríbite a les nuestres novedaes
