A pesar de tar fuera de los usos oficiales y de les prohibiciones esplícites y implícites —como la humillación y la risión—, l’asturianu llegó hasta güei gracies a los sos falantes y, sobre too, a les muyeres que tresmitieron l’idioma a les xeneraciones nueves. Unes muyeres que, les más de les veces, quedaron nel anonimatu y que crearon una poesía popular tresmitida en cantares de güeles a nietes, de madres a fíes y d’unes vecines a otres. Cantadores y pandereteres poníen el puntu final a los trabayos n’andecha, que siempre acababen con música y baille, y tamién animaben munches de les romeríes que se celebraben per tol país. Sicasí, dende’l sieglu XIX, la imaxe del gaiteru acompañáu del tambor foi afitándose como iconu de la música asturiana, dexando de llau’l papel de la muyer na tresmisión de la nuestra cultura. Quier dicise, el gaiteru yera un profesional que cobraba por poner música nes romeríes, mientres que la panderetera yera una aficionada que namás animaba la fiesta a los vecinos. Per otru llau, la llegada de la radio, d’instrumentos como l’acordión y de les orquestes afalaron la popularización d’otros xéneros músicales, ayenos nesi momentu a la tradición musical asturiana, lo que fixo que les panderetes quedaren tovía más arrequexaes.
«Cantadores y pandereteres poníen el puntu final a los trabayos n’andecha, que siempre acababen con música y baille, y tamién animaben munches de les romeríes que se celebraben per tol país»
Nos años setenta del sieglu pasáu nacieron dellos movimientos de recuperación identitaria nos países del Arcu Atlánticu, lo que tuvo’l so reflexu na música cola apaición d’un discursu centráu na reellaboración de la tradición combinándola con elementos del folk norteamericanu y de la canción protesta. El pop y el rock meciéronse cola tradición y la música convirtióse nun elementu más de la reivindicación cultural. Nel casu d’Asturies, l’apaición de Conceyu Bable en 1974 cambió la historia de la nuestra cultura y esi mesmu añu apaecieron les primeres entidaes d’investigación etnomusicolóxica que recuperaron los bailles, la indumentaria, los cantares y los instrumentos musicales. Too esto al traviés de la recoyida de los testimonios de muyeres que güei yá son símbolos de la cultura asturiana como Concha’i Clara de Tresmonte o Arcides ya María de Trabáu. Esto permitió recoyer el cancioneru popular y visibilizar una espresión artística tapecida a lo llargo de décades y que taba amenazada pol procesu d’urbanización del país.
«L’apaición de Conceyu Bable en 1974 cambió la historia de la nuestra cultura y esi mesmu añu apaecieron les primeres entidaes d’investigación etnomusicolóxica que recuperaron los bailles, la indumentaria, los cantares y los instrumentos musicales»
Mientres too esto pasaba, al otru llau del Eo —onde siempre foron dellos pasos per delantre—, cinco muyeres de Malpica —Prudencia Garrido, Asunción Garrido, Manuela Lema, Adela Rey y Teresa Lema— decidieron formar Pandeireteiras de Mens. El grupu xubió pela primer vez a un escenariu en 1973, nes Xornadas Folclóricas d’A Coruña, y depués viaxó per Francia, Portugal y América acompañando a l’Agrupación Folclórica Aturuxo. Dalguna d’elles teníen más d’ochenta años, pero permitieron visibilizar que les muyeres atestiguaben una parte fundamental del patrimoniu oral y, amás, desafiaron la figura hexemónica del home gaiteru. Otra manera, en 1981, Eva Castiñeira convirtióse na primer panderetera en xubir al escenariu con un grupu folk. Foi nun conciertu de Milladoiro n’A Coruña.
Galicia accediera a l’autonomía pela vía rápida y el so Estatutu declaró’l gallegu como llingua oficial de la comunidá, lo que permitió poner en marcha una política de promoción de la creación cultural y, mesmamente, una canal de televisión en gallegu que foi fundamental pa cambiar la imaxe que la ciudadanía tenía de la so cultura y de la so llingua. TVG principió a emitir en 1985 y nesos primeros meses el programa de más audiencia foi Ruada, presentáu por Xosé Luis Blanco Campaña y onde s’incluíen actuaciones de músicos, bandes y grupos de baille tradicional. Nesi escenariu, les Pandeireteiras de Mens fixeron la primer actuación d’un grupu de tocadores gallegues nel escenariu d’un programa de televisión. Asina nació la performance de la música tradicional gallega na industria audiovisual, dalgo que permitió averar la panderetera a públicos nuevos al mostrar que la tradición tamién forma parte de la música actual. Nel añu 1989, Leilía garró’l testigu de les Pandeireteiras de Mens y recuperó melodíes y coples tradicionales. A mediaos de los noventa publicaron el so primer discu, compuestu esclusivamente por pieces tradicionales, pero en 1998 decidieron dar un pasu más y entemecieron les coples tradicionales con sones actuales. Asina nació I é verdade, i é mentira, onde dan continuidá al pasáu al traviés del presente. Nel añu 2003 llegó Madama, onde pela primer vez inclúin lletres de composición nueva.
«En 2025, el país vecín dedica’l so Día das Letras Galegas a les ‘cantareiras’ y ‘pandeireteiras’. Quier dicise, a toles muyeres que tresmitieron el cancioneru tradicional y, al traviés d’él, la so llingua»
Mentanto, Mercedes Peón principió a presentar una sección nel programa de más audiencia de la canal gallega, Luar, na qu’homes y muyeres actuaben —nel mesmu escenariu onde cantaben artístes como Rocio Jurado o Isabel Pantoja— pa mostrar la tradición oral y les músiques más ancestrales de Galicia. Mercedes Peón fíxose perconocida en Galicia y nel 2000 publicó Isúe, onde ufiertó la so interpretación personal de temes que guardara años na so grabadora. La innovación —que llevó hasta la so imaxe personal al rapase’l pelo y dicir adiós a la so icónica melena— foi tan sorprendente que’l discu foi escoyíu’l meyor del añu pola revista Folkworld. Nesa mesma época, les más importantes televisiones públiques del mundu coproducieron un programa de ventiséis hores pa mostrar en directo como se recibía’l mileniu nuevu a lo llargo de tol globu. 2000 Today tuvo una audiencia de 800 millones de persones y cuntó coles actuaciones d’artistes como Björk, The Corrs, Spice Girls o Mercedes Sosa. Nel casu de TVE, l’aportación foi un espectáculu de flamencu dende’l Real Alcázar de Sevilla, un festival de Comediants dende Canaries y l’actuación de los gaiteros Xosé Manuel Budiño y Cristina Pato dende la Catedral de Santiago de Compostela. Esta última actuación foi enriba del teyáu del templu que representa’l final de la ruta xacobea. Budiño tocó cola so banda mientres un grupu de pelegrinos contempló l’espectáculu. Al conciertu sumóse Cristina Pato y, poco depués, el grupu Leilía. L’apaición de les panderetes supunxo la puesta de llargu a nivel global de la pandereta dientro de la performace de la industria musical y la cultura pop.
«El ‘fenómenu Tanxugueiras’ supunxo sobre too que les xeneraciones nueves entendieren que la música tradicional tamién yera actual. Tocar la pandereta mola y eso xeneró un boom nes ventes d’esti instrumentu»
El sieglu nuevu xeneró toa una revolución nel mundu de la pandereta gallega que fixo surdir una fola de muyeres, y tamién d’homes, que principiaron a reivindicase como músicos al traviés d’esti instrumentu. Apaecieron formaciones como Anubía, Faltriqueira, Baiuca, Mondra, Xabier Díaz o Fillas de Casandra. Con too, el boom actual nun se puede entender ensin un nome: Tanxugueiras, que pola so participación nel Benidorm Fest convirtiéronse nún de los grandes reclamos de cara a los festivales de branu. Güei, el grupu supera’l millón d’escuches en plataformes como Spotify o YouTube, lo que fixo que la música gallega entrara na era del streaming. Un fenómenu social ensin precedentes que fixo que’l grupu pasara de ser una formación musical a un referente de la cultura gallega a l’altura de Rosalía de Castro. Sicasí, el ‘fenómenu Tanxugueiras’ supunxo sobre too que les xeneraciones nueves entendieren que la música tradicional tamién yera actual. Tocar la pandereta mola y eso xeneró un boom nes ventes d’esti instrumentu. Pa dar un pasu más, nel 2025, el país vecín dedica’l so Día das Letras Galegas a les ‘cantareiras’ y ‘pandeireteiras’. Quier dicise, a toles muyeres que tresmitieron el cancioneru tradicional y, al traviés d’él, la so llingua.
Los primeros grupos de recuperación etnográfica que surdieron n’Asturies xeneraron una revolución musical que marcó’l futuru de la nuestra escena sonora, porque la so collecha permitió qu’una fornada nueva de músicos reinterpretara los temes recoyíos y los inxertara dientro del continuu cultural del Arcu Atlánticu. Nació asina la música celta made in Asturies y, con eso, les primeres escueles de música tradicional y bandes de gaites. Esta inquietú xeneró maneres nueves d’entender l’ociu, porque apaecieron les primeres nueches celtes, un puntu d’alcuentru pa una mocedá qu’andaba a la gueta de les sos señes d’identidá en metá de la sociedá post-industrial. Amás, los músicos asturianos entraron en contactu coles escenes sonores de los otros países celtes en cites como Lorient o Ortigueira. Per otru llau, en 1993 surdió Muyeres p’axuntar a artistes procedentes de distintos grupos etnográficos y reivindicar la música de percusión y el protagonismu femenín nel caltenimientu de la tradición. A lo llargo de tres décades pasaron per Muyeres 150 músiques y cantantes que güei dirixen asociaciones, grupos o escueles de música tradicional. Amás, los espectáculos diseñaos por Muyeres pa los teatros permitieron renovar la puesta n’escena de la nuestra tradición musical.
«A lo llargo de tres décades pasaron per Muyeres 150 músiques y cantantes que güei dirixen asociaciones, grupos o escueles de música tradicional. Amás, los espectáculos diseñaos por Muyeres pa los teatros permitieron renovar la puesta n’escena de la nuestra tradición musica»
La música asturiana fíxose más urbana y más abierta y la muyer —y con ella la pandereta— principió a garrar l’espaciu que-y arrampuñaren. Asina, les voces solistes de grupos como Tejedor o Gatos del Fornu incluyeron la pandereta nes sos formaciones. Otra manera, nel añu 2000, seis muyeres fundaron n’Uviéu Pandereteres de Fitoria. Tres años depués tamién nació Herbamora, un grupu formáu por cinco muyeres cola intención de renovar el mundu de la pandereta fusionándola con estilos contemporáneos. El grupu publicó nel 2007 el so primer discu, ¡Sali, l.luna! y un añu depués llevaron el Premiu Camaretá al Meyor Cantar na so segunda edición col tema «Nosh». Al empar, nos primeros años del sieglu nuevu surdieron los Alcuentros de Pandereta Gallega y Asturiana, onde músicos de los dos llaos del Eo xuntáronse p’atopar puntos d’alcuentru y hermanar a les dos cultures. Amás, nel 2005 el Muséu del Pueblu d’Asturies principió a publicar la so colección discográfica Fontes sonores de la música tradicional, onde dedicaron un trabayu a les ufriendes de ramos. Un añu depués editaron un llibru-dvd sobre la percusión na música asturiana y nel 2007 un trabayu con trenta y dos temes interpretaos por Celestina Ca Sanchu.
«Camín de Cantares permitió da-y voz a una xeneración de muyeres a la qu’a lo llargo de la historia tuvieren negándo-y la palabra y llegó a algamar medies d’audiencia del 30%, consiguiendo cuotes de share namás superaes pol Sporting de Xixón»
Nesa mesma época principió a emitir TPA y estrenó’l programa Camín de cantares. Trátase d’una serie documental onde’l músicu y etnógrafu Xosé «Ambás» percuerre Asturies pa mostrar la so tradición oral y diversidá llingüística. La mayor parte de los protagonistes de les entrevistes yeren muyeres mayores que facíen alcordanza de bailles y cantares y que, sobre too, tocaben la pandereta. El programa, que permitió da-y voz a una xeneración de muyeres a la qu’a lo llargo de la historia tuvieren negándo-y la palabra, llegó a algamar medies d’audiencia del 30%, consiguiendo cuotes de share namás superaes pol Sporting de Xixón. Otra manera, el programa punxo a la venta un DVD esbilla de la primer temporada qu’algamó los 3.000 exemplares. Les pandereteres que salieron nel espaciu convirtiéronse en referentes del patrimoniu oral y Camín de cantares mostró la necesidá que teníemos los asturianos de venos reflexaos na pantalla pequeña. Tamién permitió poner a disposición de tola sociedá un patrimoniu que se taba perdiendo y qu’agora quedaba recoyíu en boca de les sos protagonistes. La pandereta principió a ponese de moda nel folk asturianu y convirtióse nun indispensable de les manifestaciones pola oficialidá. Amás, nel 2008 el Conceyu de Xixón entamó la primer edición de los Alcuentros cola Música Tradicional con tres díes centraos na pandereta, con conciertos y nueches en danza nel Muséu del Pueblu d’Asturies.
«Munchos grupos decidieren cambiar la manera d’encarase col repertoriu tradicional y surdieron nomes como Herbamora, Rodrigo Cuevas, Eva Tejedor y les Panderetes, L-R, Muga, Algaire o 6 Riales. Formaciones que, axuntando pandereta y otros instrumentos buscaron reinterpretar la tradición coles ferramientes de les que dispón l’Asturies del sieglu ventiún»
Sicasí, nel 2009 la economía española entró oficialmente en recesión y impúnxose l’austeridá. La crisis valtó tolos pegollos llevantaos nes décades anteriores y entróse nun periodu de desánimu qu’afectó a la creación. Con too, la música asturiana supo reinventase y volvió a l’autoxestión, porque la xente vinculao al mundu del folclor entamó les Nueches en danza, un eventu pa potenciar la música y el baille tradicional onde la pandereta yera la protagonista. Esto permitió que la tradición llegara a un públicu más ampliu, a xente que namás quería pasalo bien cola música y el baille. Munchos grupos decidieren cambiar la manera d’encarase col repertoriu tradicional y surdieron nomes como Rodrigo Cuevas, Eva Tejedor y les Panderetes, L-R, Muga, Algaire o 6 Riales. Formaciones que, axuntando pandereta y otros instrumentos buscaron reinterpretar la tradición coles ferramientes de les que dispón l’Asturies del sieglu ventiún. Una xeneración nueva de músicos que nun tien mieu a axuntar los sos raigaños coles coses que-y presten del mundu modernu. Güei los cantares recoyíos polos grupos etnográficos suenen nos chigres de moda de Xixón, onde folkis, hipsters y viceversa baillen y aplauden a L-R, Rodrigo Cuevas, Eva Tejedor o Algaire. Nomes qu’algamaron dellos fitos pa la historia de la música asturiana, como L-R, que fixeron una de les xires más llargues de los últimos años n’Asturies y que los llevó a actuar en festivales d’Inglaterra xunto a los nomes más importantes de la escena folk internacional, o Eva Tejedor, que nel 2018 y depués de trece ediciones, convirtióse na primer panderetera en recibir el Premiu AMAS a la meyor instrumentista. Per otru llau, Algaire, amás del Premiu Camaretá al Meyor Cantar, fíxose col Loïc Raison pa grupos nuevos del Festival de Lorient del 2022. A estos hai que sumar los premios AMAS al meyor discu folk que llevaron Eva y Les Panderetes nel 2019 por L’entamu y Algaire nel 2023 por Coral y marea. Amás, nun se puede dexar de llau’l Premiu Nacional de les Músiques Actuales que’l Ministeriu de Cultura entregó a Rodrigo Cuevas nel 2023. Una revolución de la escena folk gracies a un procesu continuu de reinterpretación de coses nueves y vieyes. Un procesu de resistencia y reellaboración crítica que, anque va más sele a esti llau del Eo, muestra como la identidá asturiana —y les muyeres asturianes— fixeron por construyir un discursu pa definise y empoderase nes esferes y espacios públicos.
Suscríbite a les nuestres novedaes
